Coroz bliżyj było do Mikołaja, to tyż boł żech sie coroz bardzij, a ciotki mie yno straszyły i kozały uczyć sie bez zajonknycio rzykać. To tyż kożdy dziyń żech musioł trynować Ojczynasz i Aniele Boży. Nigdy sie niy zdarziło, żeby mi Mikołoj przirznył swojim krotkim biczym, kery mioł bezmała do poganianio koni, no i do odganianio diobłow. Dycko tyż doł mi wielki paketek z rostolicznymi maszkietami. Zaś mojimu kamratowi Stanikowi doł łońskigo roku tytka łoszkrabin ze zimiokow, bo bezmała ocyganiył swoja mamulka, że szyba w komorce wybił jego młodszy brat Hajnel, co sie wydało, bo somsiadka widziała Stanika, jak strzyloł ze szlojdra do cilipa, kery na rynnie świyrgolił.W dniu Świyntego Mikołaja już od łobiadu było słychać na naszyj drodze brzynczynie lańcuchow i głośne wyrczynie, bo to diobły lotały samopas miyndzy płotami i podwiel niy słyszały dzwonka od Mikołaja, niy było im rady. Wszystki małe dzieci, do kerych jo sie wtedy zaliczoł, niy ruszały sie na krok od starczynych kecek, tak my se to do głowy brali i wierzyli my w to, co nom starka i mamulka godały. Jak już dzwonek było w siyni słychać i te wyrczynie diobłow, to strachu pełne galoty było. Nojprzod dycko diobły wparziły do izby i takigo larma narobiyły tymi lańcuchami, a o śmiecyniu słomom to już ani niy wspominom. Przeca łony były wszystkie jakimiś powrosłami ze słomy w pasie powionzane. Dopiyro za nimi wloz Mikołoj z aniołami i powyganioł z izby te diobły do siyni. Diobły tam cołki czas butlowały i czekały yno na słowo Mikołaja, bo jak kery bajtel niy chcioł rzykać abo tyż co inkszego mioł na sumiyniu, to zaroz wołoł Mikołaj diobły, a te yno na to czekały, żeby wparzić nazod do izby i pokulać sie pod nogami wystraszonego bajtla.Piykne to som wspomniynia i trza by zaś takich Mikołajow z diobłami i aniołami, żeby niyjednego bajtla do porzondku prziwołać.Szkoda, że to tak krotko człowiek boji sie Mikołaja, bo jak już potym zaczon żech poznować u niego szczewiki ujcowe na nogach, skończyła sie ta piykno bojka i przigoda z diobłami, kere łogony miały z pończochy nafilowanyj słomom.UTOPEK
Komentarze