20023502
20023502


Ty mi tu Kazik niy reskiyruj, w czym mom chodzić...! Niy taki lata ciepłe były i nigdy żech po chałpie niy chodziył w samych badkach czy tam inkszych krótkich galotach. Dyć by mie gańba było przed somsiadkami i znajomymi tak chodzić.- Co to za gańba? Dycko żeście godali, że gańba mocie przikryto, a tu zaś wydziwiocie. Dyć krotkie galoty tyż ta gańba przikrywajom, pra?- Co wy tam młodzioki wiycie o gańbie. Nawet do kościoła leziecie w krótkich galotach.- Kaj żeście widzieli, żebych szoł do kościoła w krotkich galotach?- O ciebie niy godom, ale jak my byli ze starkom na wycieczce we Wiśle, to żech widzioł takich z rukzakami na plecach i w krótkich galotkach jak do świyntego miejsca wlazowali. Gańby ni majom za grosz, nasiyni dioseckie...!- I to wos zgorszyło? Przeca to nic złego iść porzykać przed wyprawom w góry, to jakichś turystow żeście na pewno widzieli. Jak jo był na obozie harcerskim, to my dycko w krótkich galotkach do kościoła chodziyli.- Harcyrz to jest harcyrz, ale taki zwykły to obraza bosko!- Starziku, wy dycko yno na nos młodych coś mocie. Jo bych yno chcioł pogodać z jakim waszym kamratym, czy wyście dycko taki korekt byli za młodu. Starsi dzisioj tyż niy som lepsi. Dyć zeszły tydziyń żeście tak przezywali, że w telewizorze jakiś znany gość siedzioł w krotkich galotkach i robiyła śnim wywiad piykno, młodo spikerka.- Co tu darymnie godać, ani mi niy wspominej tego hampelmana. To było na drugim programie, takich dwóch starszych gości siedziało w studio i ta moja ulubiono spikerka robiyła z nimi wywiad. Toż tyn jedyn był po ludzku obleczony, tak jak sie noleży, ale tyn znany kapelmajster łorkiestry symfonicznyj siedzioł w krótkich biołych galotkach, biołyj jakiś chabeli i pod karkiym mioł różowo szmatka zawionzano. Keby to jeszcze siedzioł jakoś normalnie, ale rozkroczył te krziwe gyry! Nic yno płakać nad takim hampelmanym. Tak sie ludziom w cołkij Polsce pokazować! Jo bych ni mioł odwagi potym łorkiestrom dyrygować. Ta spikerka ani tego wywiadu niy poradziyła prowadzić, widzioł żech, że jom gańba było za tego chopa, cołko czerwono boroka była.Teraz byda dowoł pozor, czy tyż go kiedy pokożom tak łobleczonego na jakimś koncercie symfonicznym. Możno to teraz tako moda nastała? Abo tyż mo sie już ku końcowi świata, bo kto to widzioł tako rozwiązłość. Jakby nasi starka z grobu stanyli i to wszystko uwidzieli, toby zaroz na pońć do Czynstochowy polecieli...

Komentarze

Dodaj komentarz