– Starziku, tako rompla to żech widzioł łoński rok wisieć w waszyj pywnicy. Jest łona tam jeszcze?– Na pewno bydzie, bo kto by jom wynios, przeca yno jo tam chodza i nic żech takigo niy wyciepoł. A po co ci rompla, chcesz spróbować fuzekle na nij wyprać?– Wy te gupoty dycko mocie na wiyrchu, niy chca prać, yno momy w szkole tako izba regionalno i ta pani, kero jom założyła, prosiła coby my w doma poszukali jakich starych eksponatow.– Pódymy do pywnice, to tam możno wiyncyj takich klamotów znojdymy.– To od kiedy ta rompla tam wisi, starziku?– Ho! Hooo..! To chyba już wiyncyj jak sześćdziesiąt lot, bo na nij jeszcze nasi mamulka prali. Bo krotko po wojnie to już nastały taki robione pralki. Znojdli sie taki machry, co to godajom teraz na nich „złoto rączka”, kerzi zaczli bajstlować taki waszmaszyny. Ciynżki to było jak sto diosi i biyda to było do kuchnie wpryczyć. Jeszcze trza było w kolejce na nia czekać, bo wszyjscy chcieli wtedy prać na tym. Pamiyntom, jak nasi mamulka tyż roz se w tyj dioseckij maszynie poszwy prali, to ich potym rozmatłać niy szło.Potym, kańś w piyńćdziesiątych latach, na grubach dowali talony na pralki, to już były piykniejsze te maszyny do pranio. Mi się zdo SHL-ki sie nazywały, a potym „Franie”. Coroz nowe wynochwiali tyż rzeczy ku tymu: jakiś grzałki, wyrzimaczki, potym wirowki, aż teraz taki cuda, kere ci poradzom cołko chałupa zaloć. Ani starce niy godej, żech taki klipa i otwiyrom automat, kery prawie wody nabroł do płokanio.Musza ci jeszcze pedzieć, że w takich pralkach, jak ta „Frania” to na wsiach baby masło działały i fest se chwoliły te nowe wynalazki, bo już niy musiały kijokiym z maśniczki, przez godzina fechtować.Teraz tyż ludziom pomyślonkow niy brakuje, niydowno w telewizorze pokazowali chopa, kery nojsmaczniejsze flaczki poradzi warzić. Nic ich niy czuć, bo ich wciepuje do automatu, załączo jakiś program i wyciągo czyste, odwirowane flaki, kere już ani warzić niy trzeba, yno pokroć, prziprawić i... szkoda godać, co to jeszcze dzisioj niy wymyślom – możno tyż tako maszyna, kero za nas bydzie jadła, a nos tego oduczy.
Komentarze