- Niy, starziku, ale skuli Dnia Nauczyciela dziołchy wymyśliły, że zrobiymy naszym rechtorom niyspodzianka. Chcymy zrobić taki mały tyjater, jak to downij w szkole było, i myśla, że kto jak kto, ale wy mi nojwiyncyj umicie pomoc. Powiydzcie mi yno, jak to downij w szkole wyglondało.- Jo ci zaroz powiym, ale tyj godki jest za dużo, bo tyż wiyncyj sie w szkole dzioło niż dzisioj. Po piyrsze, rechtory wtedy mieli wiyncyj do powiedzynio i wiynkszy posłuch u szkolorzy.- Co tyż to starziku godocie, przeca w tych waszych czasach żeście mieli yno ze trzi przedmioty do uczynio. Rachunki, jynzyk polski i jeszcze tam coś, a my dzisioj tela tego momy, że głowa boli. O klasowkach to ani niy wspominom, bo o tym żeście niy słyszeli chyba.- Za to wiynkszo dyscyplina my mieli i żodyn niy opowożył sie na lekcji godać, a o pyskowaniu rechtorowi, jak to dzisioj robicie, mowy niy było. Niychby yno kto spróbowoł, toby ze sinom rziciom du dom szoł abo ze spuchnytom rynkom. Niydowno w telewizorze godali, że tam kańś rechtora pobiyli szkolorze, bo im zło ocyna wystawiył. To dopiyro nos starych głowa boli, jak to słyszymy.- Chyba starziku niy powiycie, że wos w szkole biyli?- Jak żeś zasłużył, to ci zaroz galoty wytrzepali. Kożdy rechtor mioł na katedrze grubo trzcina, kero mu do dwóch rzeczy była potrzebno: pokazywać jaki miejsce na powieszonyj mapie i do pranio po rzici abo po pazurach.- To teraz już wiym, czamu żeście mi ta śpiywka śpiywali o szkole:Hej bracia sokołyNiy chodźcie do szkoły,Bo szkoła to hareszt,A rechtor to buks...!- Ty diosecki najduchu, jo ci takij śpiywki niy śpiywoł. Skąd to znosz? Jo ci inkszo śpiywoł:Jak jo chodziył do szkoły,Uczyli mie rechtory,Jedyn dwa, trzi, sztyry,To som piykne litery...- To już dalij zaśpiywejcie ta drugo zwrotka:Jak jo chodziył do szkoły,Uczyli mie chachary,Piwo pić, w karty graćI z dziołchami tańcować...!Dziynkuja wom, starziku. Już wiym, jaki tyn tyjater na te rechtorski świynto zrobiymy.
Komentarze