– W naszyj szkole cołko rynna urwało, ale zanim woźny sie kapnył, to już jej niy było i straciyła sie bez pogrzebu.– Jak to sie mogła stracić? Zaś takigo wiatru niy było, żeby jom tak daleko zaniosło.– Zaniosło, zaniosło, starziku, spadła za płotym i tam bez mała nog dostała. Nasza rechtorka szła rano do szkoły, to widziała Raciborskom jechać dwóch złomiorzy ze szportlikiym, na kerym wiyźli jakoś długo ruła. Jedyn jom trzimoł za koniec, a drugi cis tyn wozek, na kerym drugi koniec był wsparty. Jak prziszła naszo pani do szkoły, to prawie dyrektor i woźny ze synkami szukali tyj rynny na szkolnym boisku i kombinowali, jak tyż wiater mog porwać tako długo cingowo ruła. Byliby dali sie spiyrali, że jom tromba powietrzno jako porwała abo inkszo meluzyna, keby im nasza rechtorka niy pedziała, co po drodze widziała. Dyrektor yno padoł: – No i szukaj wiatru w polu...– No ja, teraz juzaś momy tak jak za starego piyrwy, pełno „elwrow” sie naplongło. Roboty ni ma, co majom te biydoki robić? Kaj jaki konsek zielaza leży, zaroz nog dostanie. Dobrze, że niby czyszczom miasto z charbozi, ale keby przi tym niy kradli. Dyć niydowno ujcowi Stanikowi cołki skrzidło z bramy wjazdowyj sie straciyło i fortka, a do sylwestra przeca jeszcze daleko.Ani sie te złodzieje sztromu niy bojom, co chwila kajś sie droty elektrykorzom tracom, chocioż pod napiyńciym som. Umrzikow tyż sie niy bojom, kiej z kerchowa sie tracom figurki i krziżyki metalowe. Skorani Boski z tymi złodziejami! Jednak piyrwyj tego niy było, tyż sie czasym zdarziło, że coś sie komu straciło, ale jednak te „elwry” mieli swoj honor i z grobow tam nic niy kradli.– Zaś tak, starziku, niy chalatejcie, bo sami żeście mi kedyś godali, że jakiś kolega od waszego tatulka był w nocy na kerchowie i przinios do szynku tabulka, kero była na grobie postawiono.– To była inkszo sprawa, tam szło o weta. To niy był żodyn kamrat tatulkow, yno taki znajomy, kery był bezrobotny i dycko od nich na piwo wychcówoł. Chcieli sie go pozbyć, to z gupot mu pedzieli, że jak prziniesie tabulka z kerchowa od starego Piskule, to mu dwa piwa postawiom. Skąd tatulek mogli wiedzieć, że łon to weźnie na serio i rychtyk ta tabulka prziniesie. Postawiyli mu te piwa, ale musioł to iść nazod przikryńcić. Żeby jom kaj niy wyciepoł, to potym jeszcze z dwoma kamratami pośli śnim na tyn kerchow. Strachu mieli pełne galoty, wiater prawie tyż tak wywijoł, a przeca na rybnickim kerchowie „Czorno Małgola” straszyła ludzi.– Tego żeście mi nigdy niy godali. Jako „Czorno Małgola”?– O nij ci, Kazik, inkszy roz połosprowiom. Ida se mojigo teju napić, bo mie w karku dropie, zaś mie chyba jako gripa chyto...
Komentarze