- To zaś sie bydziecie mynczyć we Wilijo z tym trzaskaniym konopio.- No chyba mi Kazik juzaś pomożesz, tak jak łońskigo roku. Przeca mosz już wiynksze muskle niż jo. Z tom konopiotkom to sie już myncza od tego czasu, jak żech sie ożyniył.- Toż czamu wy to robicie? Jak jo pamiyntom, sami dycko po to chodzicie na torg. Dyć od warzynio som przeca baby!- Starka wszystko reszta sama robi, ale u nich w doma konopiotki niy robiyli we Wilijo. Jo o tym sie dowiedzioł w piyrszo wilijo po ślubie, jak starka zrobiyła jakoś zupa z rybich łepow, bo tako u nich w doma dycko jedli we wilijo i jo wtedy mioł po wszystkim. Bez konopiotki ni ma u mie wilije, choby niy wiym jaki inksze jodło było, zawsze piyrsze sie wieczerzo od konopiotki zaczynało. Moczka i makówki to u starki Reginy w doma tak samo robiyli i to ni moga chalatać, starka dobre robi. Na drugo Wilijo już żech niy czekoł, yno som żech sie chyciył warzynio. Jeszcze moja starka wtedy żyła i nauczyła mie po gibku.- Dobrze starziku, że to umicie, bo mi fest smakuje, keby niy wy, to bych niy wiedzioł, jak konopiotka smakuje. Pamiyntom jedyn rok, coście we Wilijo byli tak fest chorzi na gripa, tyj konopiotki, co mama za wos zrobiyła, to jeść niy szło.- No ja, bo twojimu tatowi sie konopio tłuc wtedy niy chciało i przemloł to bez maszynka do miynsa. To wyglondało choby jako czorno polywka i pełno tych pomlotych szupow w tym było. Toż siednij sam bliżyj ku mie, bo świynty czas, żebych cie nauczył konopiotka robić. Weź se blajsztift i zeszyt, a napisz se to, bo jak jo sie straca, to cie żodyn niy nauczy. Trzeba kupić trocha wiyncyj, jak pół fonta konopio, poł fonta kasze jaglanyj, ale musi być bez szupow, tako żółto. Jeszcze font krup pogańskich, ale mogom tyż być zwykłe, taki grubsze, no jeszcze dwie doś wielki cebule i możesz sie chytać roboty. Nojprzod postow na piecu te konopie w garcu i zalyj litrym wody. Jak woda zawre, to weź zip abo jaki wiynksze sitko i odcedź ta woda, bo sie na nic niy godzi. Nalyj nowyj wody i teraz trza warzić tak długo, podwiel konopie puści taki biołe korzonki. Nikedy to i trzi godziny trwo, trza dować pozor i dolywać wody, żeby niy wywrała. Ta woda odcedzosz do takigo wiynkszego garca, kaj sie bydzie warzić ta konopiotka. Teraz jest ta ciynżejszo robota, bo trza tłuczkiym tłuc w garcu te konopie bez wody i co jakiś czas przepłukiwać przez sitko i zbiyrać te mlyczko, co wytłuczesz z konopio. Tak długo trza to robić naokoło, aże już poleci jałowo ta woda. Teraz jak to zacznie sie warzić, pokrejymy do tyj zupy cebula w taki szajtki i dalij warzić. Zatrzepać potym trzeba drobno przemlotom kaszom jaglanom, rozfyrlanom w wodzie, żeby sie bryły niy porobiyły. Na tako porcja jak na sztyrech-piyńciu to trza kajś trzisztwierci szklonki tyj kasze pomloć. Jak wszystko zawre, to sie zupa prziprawio solom, pieprzym (teraz już idzie lepij prziprawiać, bo som te jarzinki abo wegety). Na som koniec sie dolywo kwaśnyj, gynstyj śmietonki według uznanio, dokładnie rozfyrlać i loć przi wieczerzy do talyrzow, w kerych sie nojprzod kładzie już ochłodzone krupy pogański, przed tym na gynsto uwarzone w osolonyj wodzie. Teraz yno palce lizać - takigo smaku, lekko gorzkawego, ni mo żodne inksze jedzynie. Na konopiotka sie czeko cołki rok, bo yno we wilijo smakuje nojlepij.
Komentarze