20030508
20030508


Nikiere baby poradziyły opowiadać śmiyszne i masne wice, a stareczki rozprowiały o diobłach i utopkach. My, bajtle, mogli tyż tego słuchać, ale musieli my siedzieć cicho na delinie. A musza wom pedzieć, że wtedy nie było jeszcze u nos telewizyje, a radio to było yno lecy kaj we wsi. No i ludziom żeby sie nie mierzło, to radzi chodziyli na szkubani piyrzo. Nojlepij ze wszystkich dziołchow umiała śpiywać Maryjka, a łod nij karlus Jorguś przigrywoł ji na mandolinie. Piyknie sie słuchało tych pieśniczek, że nikedy to aż płaczki z oczow leciały. Jak Maryjka śpiywała o nieszczyńśliwym kochaniu, ło takich młodych, co im łojcowie broździyli i nie dali sie im pobrać. To ci młodzi skuli wielkigo miłowanio wypiyli liter karbole i sie łotruli. Wszyjscy głośno ślimtali, a jo chyba nojgłośnij, bo jo tego nie umioł spokopić, jak łoni mogli taki świństwo wypić, dyć to tak łokropnie śmierdzi, a ludzie tym szprycujom hajźle, żeby chrobokow nie było. Staro Paulka poradziyła fajnie rozprowiać ło utopkach, wiedziała, w kerych stawach żyły i jak sie nazywały. A ryszawo Hyjdla, kero miała 50 lot i była dziywicom, bo noleżała do stowarzyszynio św. Zyty, poradziyła godać taki masne wice, że my sie za dołki trzimali i pukali ze śmiychu. Roz tyż na te szkubani prziszoł stary Hanys Kopyciok. Jak łon zaczon rozprowiać ło dwóch wojnach światowych i ło trzech powstaniach ślońskich, to wszystkie baby tak się zasłuchały, że zapomniały ło szkubaniu. Taki szkubani trwało tydziyń abo i dwa tydnie. A jak już było piyrzi wyszkubane, to gospodyni zrobiyła szkubaczkom snoszki. Napiykła krepli, kołocza, nawarzyła bonkawy, łotwarła flaszka swojskigo wina i było wysoło. Na te snoszki prziszła tyż pani Yma i chocioż to była prosto kobiyta, to była bardzo mondro. Znała się na ziołach i poradziyła wylyczyć roztomańte choroby. Nojbardzij na Ymki czekały młode dziołchy, bo chciały wiedzieć, jaki jest lykarstwo na miłość. Ale ciotka Ymka, bo tak my ji wszyscy godali, pedziała im, że takigo lykarstwa jeszcze żodyn na świecie nie wymyśloł, ale som takie ziela, kere trzeba do kupy zmiyszać, zaparzić, a potym to ło północy wypić. Te ziela to lubczyk, płatki róży i gynsi pympki. Po tej kuracyji dziołcha mogła znojść swojigo galana.

Komentarze

Dodaj komentarz