- Zaś się, starziku, niy robcie takim starym chopym. Jeszcze byście niyjednego młodzioka przeskoczyli. Jak bych niy wiedzioł, wiela lot mocie, tobych nigdy niy padoł, iże z wos stary chop. Dyć znom takich, co niy robiyli tak ciynżko na grubie jak wy, i dużo młodsi som, a chodzom z nożki na nożka.- Ja, jak niy patrzom na to, co jedzom, i mało sie ruszajom, to roz dwa sie człowiek zestarzi. Jo tam niy czekom, aż ta bioło po mie przidzie, yno szpacyruja dziynnie po mieście i po szałfynstrach zaglondom.Już sie niy umia wiosny doczekać, aż zaś byda mog na kole pokarować po naszych piyknych leśnych trasach. Ale przeca o tych walyntynkach żech ci zaczon godać. Przedstow sie, że mie to tyż chyciyło latoś i wybroł żech sie w tego sztyrnostego na obchod miasta, bo chcioł żech starce Reginie jaki piykne serce kupić, coby i młode lata przipomnieć, kiedy to dycko przi odpustowych budach kupowoł żech i serce z piernika. Chodza i szukom po sklepach, co by i tu za serce kupić. Jak mie znosz, to wiysz, że bele jakigo bych niy kupiył. Pizło mi coś do dekla, żeby kupić taki serce, na kerym by był jaki napis po naszymu, po śląsku. Umisz se to przedstawić, że prawie cołki miasto żech przelecioł i nikaj takigo serca ni mieli. Sprzedowaczki mi zachwolały rostoliczne bomboniyrki i inksze puciynki piyknie w ksztołcie serca zrobione na przileżytość tego świynta, ale na żodnym niy pisało nic po śląsku. Rostolicznie pisało: „Kocham Cię”, „Tylko dla Ciebie”, „Dla mojej Kochanej”, „Dla mojej Walentynki” itp., same taki napisy, kerych już niy poradza spamiyntać. Jo se tak pomyśloł: Alojz, ale tyś jest gupi, rychtyk ci na starość w dekel pizło. Przeca jak prziniesiesz taki serce du dom, to cie Regina wyśmieje. Jeszcze se pomyśli, że mi sie wopno zaczło w żyłach lasować na przedwiośniu - takich serduszek, na kerych niy poradzom po naszymu coś napisać, niy kupia i szlus! Ida już pomału du dom, mijom po drodze od Świyrklańca ku bazylice takich synkow przebleczonych za taki wielnoski, czerwone serca i prziszło mi do głowy, żeby po drodze wlyźć do cukernie po jakiś tortynsztiki ku bonkawie. Wloz żech do tyj ciastkarnie kole Rospynka, wiysz kole tych piyrszych świateł, kere w Rybniku założyli. Tam dycko chodza, bo jak kupia za piyńć złotych, to mi dycko jedne ciastko prziciepnom, ale juzaś żech sie znerwowoł.- Czamu, starziku?- Bo tam se leżom za szybom taki piykne torteczki w ksztołcie serca, kere bych zaroz kupiył, ale keby na nich stoło: „Dlo mojij babeczki” abo „Przaja Ci, Dziubeczku”, „Yno dlo Ciebie”, ale na nich stoło: „Only you”, „Kiss me” i inksze cudze napisy. Kupiył żech napolełonki za piyńć złotych i myśla se: dziwej się, Alojz, jakich to dzisioj momy ksztołconych cukernikow, nawet po angelsku umiom. Co za czasy!
Komentarze