Było to w czyrwniu, w dwadziestym szostym roku. Ciynżki to były czasy... Rybnik już piyńć lot do Polski noleżoł. Piłsudski niycołki miesiąc tymu rząd łobulył i zaczła sie sanacyjo.Starszy braciszek małego Emilka mioł już piyńć lot skończone i urodziył sie w Niymcach, chocioż od ślubu sztyjc w tym samym miejscu miyszkali. Hanys Kowolik i jego baba Anna - łojcowie tych synkow - niy poradziyli tego pojąć, że starszy śnich, Konrad, bydzie niby-Niymcym, a młodszy, Emil, mo być Polokiym.Kiej tak! - padoł Hanys. - Oba bydom Ślązokami, bo dycko tu Śląsk był i bydzie. Fany tam rostoliczne mogom se wiyszać w łoknach, ale jo swoji wiym i tego sie staro bydymy trzimać!Hebama, kero piyrszo na tym świecie Emila w rzić pizła - bo niyskorzij to go niyroz same życi po nij prało - pedziała do Any:- Kowoliczko! Zdo mi sie, że niydługo wojna bydzie! Łostatnio samych synkow odbiyrom. Tyn wasz jest piykny i zdrowy głos mo, jak tyn synek ze Sosnowca. To prowda, że jest malutki, taki połfontek, ale widać, że sie na łojca musioł podać. Taki możno bydzie śniego „Szkyrtek” jak tyn wasz chop. No ale to tam ni ma żodyn feler. Moj jest taki wielki, że mu nogi z łożka wystowajom, a kole waszego Hanysa se stanyć ni może.Coż to Rołza godocie! Wasz jest taki spokojny, niy taki jak moj narwaniec.Narwaniec, ale taki zabiyżny, że wom nic niy brakuje, wszystko wom widza umi porobić, no i robota mo. Moj Sztefan yno ta faja ćmi po cołkich dniach i na leżance sie wylyguje jak stary kocur. Do roboty go nikaj przijońć niy chcom, bo taki zawalaty. Jo musza na cołko rodzina zarobić, jak ta Cygonka. Cygon yno leży i ani po wągiel do pywnice niy ślezie, bo sie tam w dźwiyrzach niy poradzi śmieścić.No, moj Hanys tam wszystko porobi w doma, ale do kieliszka za to czynsto zaglądo. Robota tyż mo fajno na werku, ale kto wiy, czy by jom mioł, keby mu jom moj łociec niy załatwiył.Że tam chop wypije, to zaś tam ni ma taki feler. Moja starka niyboga dycko mi godała: Dziołcho! Lepszy jest ożralec niż niydbalec! I to jest świynto prowda, Kowoliczko!- A jako docie tymu małymu, mocie już jaki miano?Tymu starszymu my Konrad dali, po starziku od Hanysa. Myślała żech, że to bydzie dziołcha, już wszystko na różowo mo pokupione i miano miałach łobrane - miała być Milka po mojij mamulce, ale teraz mu trza dać chyba Emil.Cdn.
Komentarze