Emil przijechoł dziepiyro w sztyrdziestym szostym pod jesiyń. W samych fuzeklach borok piechty szoł aże do Rybnika. Jak sie go kery pytoł, kaj był, to godoł, że w niewoli w tych „ciepłych krajach”, i rynkom pokazowoł te miejsce, kaj słońce wschodzi. Bestoż tyż szoł boso, tak idzie pedzieć, bo w jednyj fuzekli na nodze. Do drugij nabikowoł pełno ziorek słonecznika, żeby po drodze z głodu niy umrzić.Konrad, chocioż tyż wojna przeżył, doł sie dopiyro znać piyńć lot po wojnie. Napisoł du dom krótki list, że jest zdrowy i ożyniył sie z jakomś wdowom po nimieckim soldacie. Była to radość wielko u Kowolikow, bo wszyjscy myśleli, że niy żyje. Prziszło przeca pismo z wermachtu, że „unteroficyr Konrad Kowolik ist vermist...”, co znaczyło, że sie kańś straciył bez pogrzebu.Hanysa to żrało, że synek w Niymcach zostoł, ale pocieszoł sie yno tym, że tu by i tak ni mioł co szukać za te „hajoty”. Co chwila do Kowolikow „ubyjoki” chodziyli i po koleji brali wszystkich na przesłuchy. Na samym początku Emila wziyni i manglowali dokółka, czamu tak jak brat do „hajotow” niy wloz i czamu z wojny nazod du dom do Rybnika prziszoł, przeca mog tyż do Nimiec uciyc.- Po piyrsze - pedzioł im Emil - jo sie tukej urodziył i tukej jest moje miejsce. Po drugi, jo jest Ślązok, a niy żodyn Nimiec. Po trzeci, Rybnik jest nojwiynkszym i nojpiykniejszym miastym na świecie.- Jak to mamy rozumieć? Co nam tu obywatel plecie za głupstwa! - godo „ubyjok”. - Największe miasto na świecie, w balona nas będzie robił.- Jo tam żodnego w balona niy robia. Ni moga za to, że wy niy wiycie, że Rybnik sie ciągnie od „Meksika” do „Maroka”.Jak to „ubyjoki” usłyszeli, to sie yno na sia podziwali i wygnali Emila du dom. Widzieli, że śnim durch niy przidom.Nikaj roboty dostać Emil niy poradziył, chocioż fachman śniego był i co do rynki chyciył, to zrobić poradziył. Jeszcze za Nimca sie wyuczył za ślusorza i zaczon na Silesii przi maszynach robić. Potym, jak go do wojska wziyni, to go zaroz szoferym zrobiyli, bo przeca znoł sie na maszynach. Fachman tam dycko obstoji, a już tym tuplym, kery sie roboty niy boji. Totyż jak sie do ruskij niywole dostoł, tyż mu źle niy było. Przerobioł im czołgi na traktory i rostoliczne auta im naprawioł, kere Nimce pozostawiali, jak nazod z Rusyje śmiatali. Rusy go du dom niy chcieli potym puścić, bo takich fachmanow im było trzeba. Jak go potym chcieli z takom szczyrbatom Nataszom sporzić, to mu sie udało pichnyć do kukurzice i nocami uciekoł do Polski.
Komentarze