Krążyła o nim godka na grubie, że sie na kurzińcach zbogaciył. Broł bez mała do Nimiec krauza kurzińcow, potym tam w Aldiku kupowoł jajca kurskie, kere szmarowoł patyczkiym zatonkanym w kurzińcach i ciaproł te jajca kupione po 50 fynikow, potym sprzedowoł po 1 DM jako prziwiezione z Polski. Wiela w tym prowdy było, żodyn sie niy dowiy, ważne, że Zbyszek pora razy obracoł do tych Nimiec.Po kerymś tam wyjeździe już zostoł na stałe. Konrad mu załatwiył nimiecki pochodzynie i w siedymdziesiątym piątym dostali Szkyrtek i Regina zaproszynie na ślub swojij cery Anielki w Niymcach.Tak sie Szkyrtek rozeźlił wtedy, że postanowiył niy odezwać sie do swojij cery i do brata Konrada. Niy umioł wyboczyć tyż Konradowi tego, że szło załatwić pochodzyni gorolowi, a łonymu, włosnymu bratu, niy poradziył załatwić jakiś roboty, coby se mog trocha przirobić.Nojbardzij niy umioł tego przeboleć, że jego piyrworodno cera wydała sie za tego łoklanego gorola i do tego jeszcze w Niymcach. Chocioż Regina sie już z tym pogodziyła i co prziszoł list od Anielki, to mu go czytała głośno, i zdjyncia od swojich wnukow, kerzi sie tam urodziyli, pokazowała, to łon niy chcioł nic słuchać i łoglondać, taki zażarty był.Piyrszy roz Szkyrtek ujrzoł swojich nimieckich wnukow, jak przijechali na świynta wielkanocne w osiymdziesiątym osmym roku. Dawid mioł prawie dziesiyńć lot, a tyn drugi, kerymu Kevin dali, osiym. Niyroz ich zdjyńcia po kryjomu ze szuflody wyciągoł i meditowoł, kery tyż śnich nojbardzij do niego podany. Uznoł, że tyn piyrszy, Dawid, już takie ciche mioł do niego starzikowe umiłowanie.Pamiynto tyn dziyń przijazdu, tak ani by to wczoraj było. Leżoł prawie w garażu pod swojim przeszło 10-letnim trabantym, kerego dostoł, jak na pynzyjo szoł i mynczył sie z połośkom. Cołki mioł rynce uciaprane szmyrom, jak na plac wjechoł nowiutki czerwony audik. Z pojstrzodka wyparziło na plac dwóch bajtli i cisnom prosto ku trabantowi, kerego ujrzeli przez otwarte dźwiyrze garażowe. Trabant mioł maska otwarto i podeprzyto jakomś połodziyranom, starom krykom. Synki stanyli jak wryci, jak ujrzeli Szkyrtka z takimi czornymi pazurami.
Komentarze