- Ja, ich wajs genał! - padoł tyn młodszy i oba ciepli sie swojimu starzikowi na kark.Szkyrtek sie yno bronił i dźwigoł zmazane rynce do gory, żeby niy zmazać im piyknych, jasnych ancużkow.Po tym wszystkim Emilowi pokulały sie płaczki po licach i już w tym momyncie zapomnioł o wszystkim. Ściskaniu i całowaniu końca niy było. Szkyrtek zaroz poszoł sie umyć, a potym z biksom nimieckigo piwa w rynce szoł ze Zbyszkiym oglondać motor z tego nowego audika.Na wieczor oba bajtle siedziały już starzikowi na kolanach i wypytowali sie go o tym, jak to było z tym Skarbnikiym na grubie, kery go roz od nieszczyńścio wyretowoł. Potym tyn młodszy, Kevin, zaczon Szkyrtkowi opowiadać trocha po śląsku, przeplotane nimieckim i polskim, co łon to zrobi, jak urośnie wielki. Zaczło sie to mniyj wiyncyj tak:- Opa, ale ty sie musisz męczyć z tym dajne wagen, nich warr...?- No mosz recht - padoł Szkyrtek. - Co mom robić, jak sie gizd co chwila psuje?- Jak ja już byda duży i pójde do arbajtu, to ci kupia nowo... nowa...Szkyrtek taki uradowany, że mo takigo dobrego wnuka, kery na pewno myśli o podarowaniu starzikowi nowyj audicy, dalij go wypytuje:- Co ty, Kevinku, byś starzikowi kupiył, no powiydz piyknie syneczku.- Ja to ci kupię, ajne nowo kryka, bo ta, która podparłeś ta maska, ist już durch kaput.Szkyrtek, jak to usłyszoł, aż zblod, ale gibko sie spamiyntoł, przicisnył do sia swoje wnuki i pomyśłoł: No ja, takich czasow żech sie doczekoł. Brat Niymiec, jo Ślązok, ziyńć gorol, a to „gorolski nasiynie” na pewno sie do rady w życiu, kiej taki szprytne...Dzisioj Emil dalij trabantym szpanuje. Prawa jazdy już ni mo, to przi piyknyj pogodzie wyciskajom z Reginom przed garaż, ta grubsko pamiątka, kaj go myje i glancuje, potym na ławce se razym kawa popijajom i stare dzieje wspominajom.- Jak tyż to dobrze - padoł roz Szkyrtek Reginie - że mie Anielka niy posłuchała. Wiysz, ostatnio żech trefiył kole hołdy Sztefka ze Stanikiym. Łoba wziyni ta odprawa górniczo, a teraz wybiyrali miyndzy kamiyniami stare zielastwo. Mieli już na wozku pora zaruściałych kłodkow z krążyn i poglądali na szyb Karol, w kerym koło linowe stoji już pora lot. Na pewno kombinowali, z keryj strony sie chycić rozbiyranio, żeby go na składnica złomu wywiyźć...
Komentarze