Teraz cołki czas mu po palicy chodziły te słowa od rechtora: „Jak tak dalij sie bydziesz do uczynio przikłodoł, to bydziesz Zefek kamiynie tłuc, weź sie synku do roboty, bo bydzie źle z tobom”. Mioł recht rechtor – kamiyni tam niy tłucze, ale dycko jak z całyj cegły musioł połowka zrobić, to mu sie to sztyjc przipominało. Broł wtedy do rynki mularski młotek i już chcioł nim fronknyć tak daleko, żeby go już znejść niy poradziył. Jednak jak se to rozwożył, że lepij sie mo niż wtedy u majstra, kery go do tyj mularskij roboty prziuczoł, ośmioł sie yno i dalij po cegle nim walił. Za chalangra to były na pewno ciynżejsze chwile jego życio. Trza było malta miyszać, cegły podować na rysztunek, sztyjc majstrowi w kalfasie kopać, coby mu sie malta niy usiadła. Rynce mioł wtedy schacharzone od tego diobelskigo wopna. Teraz łon wołoł z rynsztunku: „Malta! Pokopej mi w kalfasie i podej mi ta cegła, na kero sie dziwom! A gibko!”.Jedno go yno cołki czas szpanowało: kedy to bydzie taki bogaty, jak mu to kiejsik Cygonka w Staroku wrożyła? Pamiynto to jak dzisioj – śli wtedy na muzyka ze synkami do Kłokoczynio i wdepli na chwila ku Cygonom, kerzi w Staroku przi Kłokocince prawie stoli ze swojimi wozami. Młodo Cygonka, cołko złotymi ketami obwieszono, prziszła prosto ku nimu i godo: „Daj rękę Cygance, daj! Ja ci prawdę powiem, daj, bo dobra cię przyszłość czeka”. Opiyroł sie i pytoł sie jom, czamu prawie łonymu chce powrożyć, przeca jest nos tu trzech, ale łona sie na niego uwziyna i musioł popuścić. Kamraci mu jeszcze przigadowali: dyć se dej, co ci szkodzi, dosz i dwadzieścia groszy i bydziesz wszystko wiedzioł. Jak doł rynka Cygonce i łona go za nia chyciyła, to poczuł choby go jaki sztrom przelecioł. Niy wiedzioł, czymu – czy to to, że tako była piykno, czy tyż od gańby, przeca mioł rynka cołko chrapato i posiekano od wopna i ciynżkij roboty, a łona miała miyńciutko rynka jak zamt i na dokłodka w łoczy mu patrzała choby go przewiertać chciała nimi. To, co mu potym pedziała, cołki czas za nim chodziyło:„Będziesz bogaty – pedziała – bo nie boisz się ciężkiej pracy. Dobra i gospodarna dziewczyna za tobą tęskni, ale ty jej nie zechcesz, zostaniesz starym kawalerem i na nie swoje dzieci będziesz pracował. Skarb cię czeka wielki! Złoto na ciebie spadnie, tylko uważaj, żeby chciwość tobą nie zawładnęła.Niedobrych kolegów unikaj, nie pij tyle wódki, bo sam sobie swoje szczęście szybko zmarnujesz”.Co chwila mu te wrożyni w głowie kolyło, a już nojbardzij jak w łożku leżoł. Jak go to naszło, to już potym usnyć niy poradziył, nikedy do rana rozważowoł:„Wszystko to, co mi ta Cygonka wrożyła, to mie spotkało. Robia na dzieci od mojij siostry. Gynia Szkatułowa, dobro i gospodarno dziołcha, była za mnom gupio, a jo se to som zaproł, inkszy jom dostoł, teraz brakuje yno tego złota. Tyn „skarb” od Cygonki by sie przidoł. Niy musiołbych sie tak mynczyć. Chciwy na pewno niy byda. Jak go znejda, to połowica dom biydnym, ale nojprzod go musza mieć”.Dość pora lot tak Zefek rozważowoł, a „skarbu” jak niy było, tak niy było. Koledzy, kerzi byli wtedy śnim przi tym wrożyniu, czynsto sie podśmiywali śniego przi piwie w szynku u Poloczka i napasztowali: „Prziznej sie yno, kaj mosz te złoto zakopane!”, abo : „Postow po piwie, bo bezmałaś żeś coś wykopoł w zegrodzie!”. Zefek sie yno śmioł z tego, a że niy był łostatni, niyroz komplom postawiył i niy yno po piwie, ale czynsto po sznapsie. Przeca ludzie sztyjc chałupy stawiali, a mulorze wtedy dobrze zarobiali. Roz sie yno znerwowoł, a było to u Sojki, bo tam sie dycko chopy zbiyrali w laubie i berali o polityce. Keryś zaczon juzaś o tym „skarbie” i wszystke te chopy zaczli sie z Pochcioła pośmiywać. Zefek stanył, coś tam poszeptoł i za chwilka przyszły ku nim dwa wielki czorne psy.
Komentarze