Było to nojprzod pora drzewiannych chałup z dziwnymi wieżyczkami, ogrodzonych płotym ze zaszpicowanych kołow, przed kerym wykopali głymboki przikopy i napuścili do nich wody ze rzyki. Przikopy te były taki głymboki i taki fest szagi wały usypane były, że mowy niy było o tym, żeby szło bez nie przyńść. Łodkom to by tam szło przepłynyć, ale kto by tam potym na takij stromiźnie umioł sie wydropać, a potym jeszcze przez tyn płot z ostro zaszpicowanych okolnikow przelyźć.Gibko sie jednak rozrosło te grodzisko, bo leżało gynał na krziżowce wielkich szlaków handlowych, kere kludziły z połednia na połnoc i ze wschodu na zachod. Ciongło tymi szlakami moc karawanów kupieckich i bardzo im było na rynka, że mieli teraz kańś sie przespać, zjeść coś, wypić i – mo sie rozumić – zabawić. Trza tyż tukej pedzieć, że naokoło Raciborza ciongły sie gynste lasy, pełne rostolicznego zwierzo, totyż książe sztyjc gościył chyntnych do polowanio na nie i niy żałowoł nikomu z biysiadnikow dobrego wina, kere prziwoziyli mu przi sposobności kupczyki z Francyje i z Italyje.Gibko sie rozniosło daleko, że wielki gony tukej robiom i niyjedyn bogocz tu przijechoł z dalekich stron, coby sie godnie zabawić i ustrzelić dorodnego jelynia, króla górnośląskij puszcze, abo tyż jakigo sornika, głuszca, dzika abo bobra, kerych w tych czasach pełno sie naplongło tukej w rzykach.Lata leciały i w XIII wieku jedyn z potomków Mieszka o mianie Kazimiyrz (był bardzo pobożnym rządzicielym) wybroł sie nawet z krziżym w rynce i z dwanastoma rycerzami do Ziymi Świyntyj walczyć z poganami, coby miejsce urodzynio Jezusa Chrystusa znojdło sie w rynkach chrześcijan. Jak nazod wracoł z tyj krziżowyj wyprawy, wzion se tyn Kazimiyrz za baba piykno złotowłoso Violetta, cera władce bułgarskigo państwa. Jako podaronek weselny dostoł od swojij oblubiynice łobroz Matki Boskij. Podarowoł go niyskorzij do nowego, prawie wystawionego kościoła w Rudach, do kerego skludziył ze wschodnich rubieżow Polski, aż z Jyndrzejowa, zakon cystersów. Rudy od tyj chwile stały sie znane daleko tym piyknym obrazym z wizerunkym Matki Boskij, a ludzie, kerzi rzykali przed nim, dostympowali tam rostolicznych łask boskich.Kiedy książe wrociył z tyj wyprawy krziżowyj do Raciborza, w podziynce za odwaga i wierność podarowoł swojim rycerzom po wielkim kynsie ziymi i lasów. Mioł tyż w tym Kazimiyrz swoji wyrachowani, rozchodziło sie o to, coby ochronić swój majontek i wandrujoncych kupcow szlakiym handlowym, przed rabczykami, kerych sie mocka namnożyło w tych stronach. Piynciu rycerzy obdarził terynami miyndzy Raciborzym a Rudami. Nosili łoni miana: Marek, Adam, Bogun, Raszko i Waniek. Tak tyż powstały miejscowości Markowice, Adamowice, Bogunice i Raszczyce, zaś ostatni śnich, Waniek, założył wieś na prawym brzegu rzyki Suminki.
Komentarze