20040607
20040607


Tukej sie juzaś ciśnie stare powiedzonko: „Piyrwyj tego niy było!”. Możecie se myśleć, co tam chcecie, ale na pewno mom recht w tyj materyji. Przeca piyrwyj tam żodyn solom szosyjow niy suł i niy było żodnych wypadkow. Ha, ha! Bo tyż autokow niy było. Jak auto przez wieś przejechało, to baby kołocze piykły, a łebonie lotały cołkimi chormijami za takim autokiym, coby se trocha tego woniu podychać. Drogi bez zima były cołki biołe, piyknie śniegiym zasute. Jeździyło sie z gorkow po szosyji na sonkach, szlinzuchach, nartach abo zwyczajnie – na zolowkach. Kerymu tam niy stykło na narty abo szlinzuchy, to broł holcoki z wbitymi klamrami z drotow i tyż poradził kiełzać jak diosi. Czynsto tyż prziwionzowało sie sonki do fory, ale tak, coby formon sie niy kapnył i zaś niy trza było pod gorka iść piechty. Najgorzij jak sie formon kapnył, że sie tam keryś podwiysiył, zaroz biczym po zadku śmignył i szło niyźle oberwać. Koniami sie tyż w tych czasach wszystko robiyło i woziyło, a traktory to sie yno ze słychu znało.W tych czasach były fest modne kuligi i w tako piykno zima – wtedy wszystki zimy były piykne i śnieżne – kożdo szkoła robiyła dzieciom tako uciecha. Rechtor yno po cichu pedzioł: „Jutro przyjdźcie do szkoły ze sankami”, to już sie doczekać niy szło. Jak my prziszli rano ze sonkami, bez taszow, to nom rady niy było, yno my wykukowali, eli już zamowione formany pod szkoła przijechali. Nikedy już na nos czekały wypoczynte i forskające konie zaprzągnyte do strąbka abo do przednij czyńści sanic.Formon prziwionzoł długi łańcuch ze zadku sani, a do niego my prziwionzowali swoje sonki. Przeważnie dziesiyńć sonek sie wiązało na pora koni i to musiały być mocne sonki. Jak kere były wedug formona słabe, to je odciepoł. Posiodali my potym na te sonki po dwoch i dalij w droga! Rechtorki przeważnie przi formanowi w strąbku siedziały, ale nikere rechtory to tyż siodały na ostatnich sonkach, bo łone nojbardzij zamiatały na zakryntach. Jechali my przeważnie do Rud ku zomku, tak przez Orzepowice, Stodoły.Po drodze nojwyżyj sie spotkało kuligi z inkszyj szkoły abo ludzi, kerzi piechty szli. Żodnych autokow my niy spotkali. W Rudach my mieli przerwa na ciepły tyj w karczmie. Trocha my sie tam powygupiali, nikedy były zawody w lepiyniu bałwana i zaś ze śpiywym nazod do szkoły.Umicie se to w dzisiejszych czasach przedstawić, taki kulig na szosyji?Teraz idzie yno spotkać pora sonek za traktorym, ale yno kajś na bocznyj drodze abo w lesie. Taki prawdziwe kuligi z koniami to yno w gorach idzie jeszcze spotkać.

Komentarze

Dodaj komentarz