I zaś momy silwestra

I zaś sie ani czowiek niy łobejrzoł a momy silwestra na karku! Jutro bydymy ło rok starsi, a my by raczyj modsi być chcieli, yno że czasu do zadku pociś niy idzie!
Downi, jak żech we silwestra szła kaj na muzyka, toch do łostani kwile lotała za balklajdym a babskimi klamorami, bo aboch ni miała pryndzy czasu, aboch nic godnego uwagi niy poradziła kupić i potym i tak żech szła we „małej czornej”, coch już w ni wiela razy była na zabawie silwestrowej!
Ale teroz coroz czynści balujymy we chałpie sami, ale czasym tyż przidom ku nom jaki znajomki abo przociele. Kożdy cosikej do jodła prziniesie, bezto je przi czym poberać!
Łońskigo roku siedzieli my we chałpie yno sami dwa, a spominali te swoji nojlepsze silwestry. Ani by sie niy zdało, że kożdy snos ich tela we swojim żywocie przetańcowoł!
Mój chopeczek spominoł, jak za karlusa był na maskenbalu, co go ni mioł we planie, ale kamraty go namowili we łostatni kwili! Jedyn synek, co mioł śnimi jechać, sie rozchorowoł i jedne miejsce było frajne. Ale za co sie przeblyc, kej czasu na wynokwiani ni ma? Modzioki jednako dycki majom taki wariacki pomyślunki, że muszom sie udać! Pożyczoł łod swoji siostry elastyczne rajtuzy, co praje do mody prziszły, na gowa zawionzoł chustka po starce, wymajstrowoł czorno klapka na jedne łoko, a na piersiach wymalowoł se modrom tuszkom dziwoki tatuaż, co go potym bez cołki tydziyń wymyć sie niy dało, a prawy pirat był fertik! Gryfnie to wypadło, jo ze czystym sumiyniym moga to poświodczyć, boch fotografijo ze tyj muzyki widziała!
Jo zaś ze swoji wczasnej modości dycki spominom jedna „prywatka” u kamratki we Rybniku. Kole siodmej rano nasze dziołchy chciały jechać do dom, ale niy było czym! Krom nos na przistanku autobusowym czakało jeszcze ze dwaścia dziołchow a drugie tyla karlusow. I tak do jednego autobusa wszyjscy by my niy wleźli, bezto my wolały deptać piechty aż do samych Żorow! Wszyski frelki, co do jednej, były we szatach mini a we stelonkach. Nogi miały modre, bo było bez dwaścia stopni mrozu! Teroz już isto wiycie skond nasze pokolyni mo rojmatyka?

Moji Roztomili, ze szczyrego serca Wom życza: Dobrego Nowego Roku 2014!

Komentarze

Dodaj komentarz