20040706
20040706


Nasze starziki, przez cołki wieki z wielkom uwagom łobserwowali wszystko naokoło siebie i wszystki ciekawostki w przirodzie dokładnie poradziyli spamiyntać, żeby potym opowiedzieć swojim dzieciom i wnuczkom. Już w grudniu umieli ludzie wywrożyć pogoda na cołki prziszły rok i jaki łon bydzie pod wzglyndym urodzaju. Tak narodziły sie te wszystki mądre przisłowia ludowe, kere do dzisioj jeszcze geldujom i zadziwiajom wysoko szkolonych synoptykow. Wiela razy te wszystki długoterminowe prognozy pogody – jak to ci naukowcy dzisioj godajom – bierom w łeb, a wrożby ludowe sie jednak dycko sprowdzajom, choć czasym podług łomanio w kościach były stawiane przez starszych ludzi.Downo tymu, jak żech już wspomnioł, jedyn drugimu to przekazowoł yno słowym, ale świat niy stoł w miejscu i sztyjc tam coś nowego ludzie wynochwiali. Tak tyż krom godanio wynojdli pisanie i wtedy to już zaczli te wszystki mądrości spisować. Tukej u nas, na Śląsku, zawsze sie bardzij liczyła godka, totyż za dużo książek napisanych po naszymu niy idzie znojść, a tych starych śląskich powiarkow spisanych w naszyj godce tymtuplym niy znojdziecie. Jednak niy idzie pedzieć, że my już nic ni momy, niyprowda, bo naszo godka w takij formie przetrwała cołki wieki, chocioż pisało sie tukej po polsku, nimiecku i Bog wiy po jakimu jeszcze. Powiarki, abo jak to godajom – przisłowia, kere tukej wom przedstawiom, znom od mojij starki, a łona słyszała od swojich starzikow i tak sie to dalij ciągnie z pokolynio na pokolynie. Pora takich powiarkow wysznupoł żech tyż w starych kalyndorzach śląskich. Kalyndorze tyż były napisane jynzykiym literackim, ale chyba yno skuli tego, że Ślązoki to mądry narod, bo godo po śląsku, a czyto po polsku. No ale przeca to niczymu niy wadzi, bo jo wom to po naszymu napisoł. Tych rostolicznych powiarkow jest zatrzyńsiyni i w kożdym miesiącu som inksze, ale te tukej niżyj som yno o miesiącu lutym.Gromnica – zimy połowica!Gromnica jak pogodno, bydzie jesiyń dorodno!Luty wyganio czasym kowolow z huty.Prziszoł luty, dobrze, że koń jest podkuty,A formon mo ciepłe boty.Jak luty niy dowo mrozu,Bydzie żyta yno poł wozu.Luty – zmarznom ci przi nosie gluty (ciompy)Luty sie czasym poradzi zlitować,że po bosoku idzie wandrować.Jak św. Maciej lodu niy stopi,Długo jeszcze w rynce bydom chuchać chłopi.Świynty Maciej zima traci,jak niy traci, to bogaci.Jak ciepło na Macieja,to wiosny nadzieja.

Komentarze

Dodaj komentarz