Starzik Konsek mioł yno jednego wnuka. Synek mianowoł sie tak samo jak starzik, ale nic wiyncy po nim niy erbowoł! Stary Konsek był za bajtla posuchliwy, pomogoł łojcom we robocie a łogromnie go we szkole kwolili, bo był grzeczny a dobrze sie uczył. Jednako nic takigo dobrego niy dało sie pedzieć ło Joziczku, łon porzad cosikej wynajduszył!
Przed Godnimi Swiyntami Joziczek był we spowiedzi i farorz mu fest uszy przeszkroboł, a potym doł mu za pokuta zrobić co dobrego do inszych i ze tym synek mioł nojwiyncy starości!
Nojprzod poszeł ku starce a padoł, że i pomoże warzić na Świynta, ale łona była rada, że sie go ze kuchynie pozbyła, bo dobrze pamiyntała, jak i łońskigo roku do moczki, co jom niy rod jodoł, nasuł pora łyżek soli a jeść sie i niy dało. Cołko starczyno robota poszła na marne!
Potym chcioł tatulkowi umyć auto, ale łojciec go zaroz łoprzezywoł:
– Synek, czyś ty zgupioł, myć auto na taki mroz, dyć by mi zomki zaroz zamarzły, a starka ze starzikym by musieli deptać piechty te dwa kilometry do kościoła na pastyrka!
– I zaś nic ze tego! – pomyśloł se wkurzony Józiczek, bo za niycołki miesionc czekała Konskow kolynda. Synek był isty, że do dom przidzie farorz, a piyrsze, co zrobi, to sie spyto Jozika, eli wypełnił pokuta, a tu ni ma jak!
To było do przewidzynio, że mamulka go tyż pożynie a niy do mu ani kota, ani psa nafutrować za to, co im zrobił ze dwa lata nazod! To było bez feryje: tyn mały gizdok patrzoł na mecz, a mamulka szła na wieczorno zmiana do roboty, bezto kozała mu łodfutrować domowych pupilkow. Synkowi jednako sie niy chciało ruszyć i dziepiyro we wieczor maloł im do misek kiszki. Łoba sie we nocy zesrały!
Teroz jedyna nadzieja była yno we starziku, a łon mu poradził, coby pomog jakimu starzikowi i myśloł przi tym ło siebie, ale nic wiyncy niy padoł.
Jak yny farorz wloz do dom, zaroz sie spytoł Joziczka, jak je stom pokutom.
– Łodrobiono! – łodpedzioł bajtel a rozpolił sie jak szyna. – Starzik łod Rojkow nios tela bambetlow i boł sie, że niy zdonży na cug!
– Pomog żeś mu niyś te kofry? – spytoł sie farorz.
– Niy, jo spuścił nasza Westa i starzik był na dworcu jeszcze piyńć minut przed czasym!
Komentarze