Jednako w końcu zgłodniały i kole drugi godziny dostały dwie godziny wolnego, coby se mogły kupić łobiod a troszka poszpacyrować po łokolicy. We tyn dziyń było tyż we tym kościele kupa pontnikow ze zagranice i cołki Polski, bezto za tym jodłym musiały deptać troszka dali łod cyntrum, ale sie łopłaciło, bo łobiod był tońszy jak na rynku a łogromnie dobry! Fundły se jeszcze kawa.
A kole poł czwortej brały sie nazod. Była śnimi jedna starszo klosztorno panna, co była tak umordowano, że ledwie szła, bo dziołchy kepsko pamiyntały droga nazod, a we poru miejscach pobłonkały. Jednako nojgorsze to było to, że niy poradziły se spomnieć jak sie mianuje ta ulica kaj mioł na nich czekać autobus!
Olka miała przi siebie komorka a padała, że zadzwoni do paniczki pilotki, co we tym autobusie już isto je, ale paniczka pilotka sie niy łodezwała, yno załonczała sie jeja poczta głosowo!
– Co tera? – medytowały we trzi, bo panna klosztorno już dość kwila siedziała na jakimś zabytkowym kamiyniu a blado była jak ściana!
Wtynczos Lynka dała pozor, że dość spory konsek łod nich we krzach przi drodze stoji radiowoz a dwa policjanty ze drogowki.
-Ida ku nim! – padała. – Bo łod czego momy ta policyjo?!
Dziołchy sie zaroz zastarały, bo co łona im powiy, jak przeca sama nic niy wiy, ale Lynka, to sie wszyndy dogodo i za granicom. Wiym cosikej ło tym, bo mi godała, jak sie roz straciła we Bratysławie. To wszystek musi być bezto, że łona niż gymba łotworzy, dycki sie łośmieje!
Policjanty ze poczontku i niy dowiyrzali, ale jak spomniała ło tej słabej klosztornej pannie, to padali, że im pomogom i załadowali wszyski sztyry baby na zadek do auta! Olka była nojchudszo, bezto jechała na klinie łod Basie. Cisły sie niymiłosiernie, ale dojechały na czas! Jeszcze im ludzie ze inszych autobusow klackali, bo podjechały ze asistom, jak ministry!
Ale niy było to za darmo: pon policjon kozoł im za sia porzykać, bo na drugi dziyń mioł urodziny!
Komentarze