We czym sie woda nosiło

Na wsi przi kożdej chałpie była studnia a brało sie śni woda do picio a do warzynio. Jak lato było fest gorki, to wody we studniach dycki brakowało! Po woda do gowiedzi a do roztomańtych robotow to sie do rzyki abo do stawu chodziło. Bezto ludzie budowali chałpy yno tam, kaj woda była, bo bez wody ni ma żywota!
We mieście to było troszka inakszy: tam małokery swoja studnia mioł, a jak już mu sie powiodło a na woda trefił, to sie musioł ze inkszymi podzielić, ale dycki blisko rynku były wiynksze studnie miejski, kaj se kożdy mog wody wziońć, ale jeszcze nojprzod jom trza było ze studnie naciongnońć a we czymś do dom przismyczyć!
Starzik łod moji mamulki, dycki do cołki wsi korby ku studniom strugoł, bo mioł w doma roztomańte narzyndzia. Wiadra downi robił bednorz ze drzewa a deseczki ściongoł bangajsym, ale porzondne wiadro do studnie trza było łokuć u kowola! Coby sie niy straciło, trza go było jeszcze przikuć lańcuchym!
Łod terynu zależało we czym a jako baby woda nosiły. U nos ponoć sie kibli a wiader używała, bo to kejś niy było to samo, jako my se dzisio myślymy. Ło wiadrze już wiycie, a kibel to była tako blaszano kastla, troszka wonższo ze spodku a miała łobłong, co sie go dało przekipnońć na bok. Do kibla troszka wiyncy wody wlazło, a jeszcze szło niyść dwa naroz bez kluki. Rynce sie przi ciele trzymało, bezto noszyni wody nie było taki procne. We nikerych wiynkszych miastach nosiło sie woda we putniach. To była tako blaszano kastla ze tryjgrami a nosiło sie jom na plecach, jednako keryś musioł pomoc tako połno putnia na plecy wciepnońć! Niy darmo godali:„Zaglondo jak koń do putnie”, bo łona tako wonsko była, że sie śni niy poradził napić!
Kaj indzi nosiło sie woda we szkopku na gowie, cołkiym jak we Afryce! Baby se wyrychtowały taki wionek abo kołko wytkane szmatami a na tym tyn drzewiany szkopek (szyrszy dołym) stawiały.
Naniyść wody to łogromnie procne było, bezto godali, że downi woda kwawo była!

Komentarze

Dodaj komentarz