Eli Żory miały zomek a kapliczka św. Barborki?

Już słysza, jak sie odzywajom ci wszyjscy uczyni, że ni miałabych ło tym godać, bo jo yno bojki pisza,
a na historyji sie niy znom!

I po troszku prawie majom, ale jo jeszcze krom pisanio, poradza suchać, co insi godajom, bo inakszy bych we tym fachu wiela niy zdziałała! Ludzie dycki spominali wiela roztomańtych rzeczy, ale niy kożdy ich słuchoł, bo se myśloł tak:
– Tyn istny je już fest stary bezto drzisto trzi po trzi, na historyji sie niy zno, wieki sie mu pomiyszały! Co tyż je warto tako godka? Dowody sie liczom, a tu ich niy ma!
Było mi ze siedymnoście, kej żech na to prziszła, że te wszyski stare godki, coch za bajtla słyszała isto zaginom, jak ich kery niy spisze, bezto ze tatulkiym połaziłach po starych znajomkach a nojlepi jak żech poradziła, ponotowałach se to, co mi chcieli łopedzieć a niy medykowałach nad tym, eli to wszystek je prowda?!
Potym jak żech już tego miała na mało ksionżka, chciałach sie tym ze ludziami podzielić, ale zaś żech trefila na takich, co wymyślali, ze jo ni mom przigotowanio „etnograficznego”, ale w końcu znod sie taki jedyn fachman, co mi chcioł ze tom materyjom pomoc, ale trwało to łogromnie dugo, bo trzidziyści lot nazod czasy były łogromnie do wszystkich ciynżki i ze ksionżki nic niy wyszło, ale jo je rada, bo mom teroz kupa tymatow do pisanio!
Łońskigo roku wyczytałach we żorskim leksykonie, że nasze miasto bezmała miało zomek, chocioż dzisio ani śladu po nim ni ma, a żodyn niy wiy ani kaj był! Zaroz mi sie tyż spomniało, że jo se kajś cosikej ło tym zapisała. Musiałach sie przekopać bez kupa zeszytow, ale sie łopłaciło!
Aże trzech ludzi, coby im już dzisio hrubo bez sto lot było, godało mi ło tym zomku, co ło nim słyszeli łod swojich starzikow. W podrobności sie te łopisy troszka rożniły, ale wszyjscy pokozowali na te same miejsce, kaj mioł stoć. Możnej cosikej we tym je?!
To samo było ze kapliczkom łod św. Barborki! Historycy downo ło ni godali, że je zaginiono, ale żodnego sie niy pytali, a żorzany wiedzom kaj je to, co śni łostało! Ci, co jom na placu majom, bojom sie, że ich ludzie bydom potym szterować, ale stykło by chocioż fotografije porobić!

Komentarze

Dodaj komentarz