Czowiek abo piniondz?

Dzisio po połedniu byłach we taki lepszej drogeryji (kaj je abo jako sie mianuje, niy powiym, myśla, że ci istni sami sie kapnom, że ło nich pisza!).
Potrzebowałach kupić jakiś elegancki parfin na gyszynk, ale przi łokazyji kupiłach se tyż lak na pazury we kolorze „blue”, bo taki je fest we modzie!
Stoła, żech kwilka nad tymi parfinami, bo ich tam było aż zatela a takich roztomańtych markow, coch ło nich ani niy słyszała! Jedna flaszeczka droższo łod drugi, a podle mie wiela sie łod sia niy rożniły, bo woniały prawie tak samo! Wiym to isto, boch pora testerow wyprobowała, a sprzedowaczka ze tego sklepu stoła cołki czos za mnom a posykiwała jako gyńś, bo sie i moji szukani zdało za dugi! W końcu wybrałach jedyn, nojwiyncy skuli tego, że mioł piykno modro flaszka, a chciałach iść do kasy.
Wtynczos do drogeryje wleźli modzi ludzie, co ich łod jakigoś czasu znom i moja wachtyrka poleciała ku dźwiyrzom jak na krzidłach! To samo zrobiła tyż ta drugo baba, co stoła za ladom i trzecio, co siedziała na kasie! Zaczły sie witać serdecznie ze nowymi klientami a łobskakiwać ich ze wszyskich stron, cołkiym, jakby tych poruch ludzi, co tam prziszli pryndzy, wcale niy było! My czekali, jak te cieliki, aż se modo paniczka wybiere kajjaki malowidła, krymy a parfiny, bo niy było komu naszych zakupow skasować! Za śćwierć godziny modo była fertik, ale wrociła sie łod dźwiyrzy, bo sie i jeszcze cosikej spomniało, a zaś to trwało drugi śćwierć godziny! Jo już miała zamiar fronknońć tyn parfinym na lada a iść do dom, ale dźwiyrze zastawioł łochroniorz, wielgi jak domb, beztoch jeszcze kwilka zetrwała, ale już sie wy mie warziło! Jak prziszła moja raja do kasy, chciałach gymba łotworzić, ale jak żech usłyszała godka kierowniczki ze kasyjerkom, to luft sy mie uciyk:
– Więcej takich klientów! Ci zapłacili prawie dwa tysiące, a tu takie drobiazgi po pięćdziesiąt albo najwyżej sto złotych...
Nikerzi bardzi cyniom kasa niż czowieka...

1

Komentarze

  • Rybniczanka Pieniądz albo człowiek 19 września 2014 11:10Śmiem podejrzewać, w której to "drogerii" jest taka obsługa, uważam, że dobrze Pani zrobiła, że zwróciła Pani na to uwagę, takie sytuacje są nagminne i zdaje się że nikogo już nie dziwią. Pozdrawiam

Dodaj komentarz