Na czym śpisz?

Madrace, co na nich śpiymy, tyż dzisio momy roztomańte: te myni zdrowe – ze plastykowej pianki i te bardzi ekologiczne, na przikład ze kokosowych sznurek!
A jako to downi było, na czym sie spowało?
Jak żech jeszcze niy chodziła do szkoły, to my w doma mieli we łożkach strużaki. Do dzisio pamiyntom, że nojwiynkszo uciecha była, jak my malowali izba, bo my we ta noc, niż wszystek wyschło, na tych strużakach spali na ziymi we kuchyni! Wtynczos wiyrch łod strużaka był już ze jutowej materyje (taki samej, co do niydowna śni miyszki na ziymioki robili!), ale słoma dali była prosto, cepami młocono! Jak sie potraciły cepy i prosto słoma, to tyż wytraciły sie po chałpach strużaki i bezto dziecka dzisio ni majom pojyńcio na czym jejich starziki spowali!
Pamiyntom, jak starczyne siostry roz spominały jakiś weseli u dalszych przocieli, kaj spało sie na strużakach we stodole, ale nojprzod trza było do nich naciś grochowin, bo sie słoma skończyła! Takigo spanio se jednako ciotki niy kwoliły, bo te grochowiny łogromnie żgały bez tyn strużak i łone sie niy wyspały!
Nasz starszy somsiod, panoczek Deptuła dycki głośno godoł, że na grochowinach ni mo sie spać, bo rojmatyki idzie dostać, a potym szeptym, coby go yno babeczki słyszały, dodowoł, że łod tego chopy majom świnski śniki! Jo to roz podsuchała i bez pora dni żech kombinowała nad tym, jak to człowiek może mieć taki same śniki jak wieprzek, a po drugi – skond ludzie ło tym mogom wiedzieć, jak ze świniami niy poradzom sie dogodać? Ale łojcow żech sie niy spytała, bo myślałach, ze tyn chop nos musioł robić za błozna!
Jeszcze we trzidziestych latach bogatsi ludzie mieli madrace ze „trawy morskiej”, bo bezmała taki były nojzdrowsze! Yno, że łona niy była wcale morsko, u nos, na Ślonsku my na nia godali wosiona, niby że do wosow podano. Rosła we lasach, ale yno we nikerych, a we Baranioku rośnie do dzisio!

1

Komentarze

  • żorzan Spanie 28 września 2014 12:09Zaroz godom, że Fejsbuka ni mom, ale komyntorz napisza: jo tyż roz społ na szlafbanku. a potym bez cołki tydziyń to czułech, tak mie pleca bolały!

Dodaj komentarz