Piyrwej to żodyn babow na dole niy łoglondoł, bezto chopy byli tymu łogromnie niyradzi, a tym dziołchom borokom roztomańte szpasy robili!
Nojprzod straszyli ich Skarbnikiym, że niby łeb ukrynco, jak zwietrzi, że to baba a niy chop sie po chodnikach wałynso! Te piyńć dziołchow niy było ze naszych stron, bezto ze strachym sie łoglondały, jak yno na doł sjechały, ale ta nasza ich uspokojała, że to ni ma prowda, bo tego Skarbnika tak na prowda żodyn jeszcze niy widzioł, ale łone i tak istne niy były!
Jedyn roz taki mody sztajger, co już teroz isto je na pynzyji, zakludził ich we taki miejsce, kaj jak sie dźwiyrze otwarło, to sie robił taki cug, że rychtik łeb chciało urwać! Te hełmy (teroz godajom: kaski), co gryfne frelki miały yno tak leko wsadzone na te piykne frizurki, to im zaroz poslatywały! Dziołchy zaczły piszczeć a łuciekać wiela siły we szłapach a sztopły dziepiyro na podszybiu! To se potym rydułtowski bergmony śnich szpasy robili
a wrzeszczeli za nimi:
– Hej, frelki czamuście niy chciały dać dziobka Skarbnikowi, yny żeście na kalup uciykały?
Potym było pora dni spokoj, bo sztudyntki poszły na skarga do dyrekcyje. No to sie obersztajger wkurził na bergmonow a zakozoł wszelakich szpasow.
Jak dziołchom jednego dnia padali, że podom pod ziymiom na drugo gruba, co sie „Ignac” mianuje, to im ani do gowy niy prziszło, jako tam na nich paść czeko!
A te rydułtowski gizdy dali znać, że „geologiczki” już idom. Skuli hycu chopy na „Ignacu” byli niyprzepisowo łobleczyni a robili yno we samych badkach. Potym jeszcze te badki sjyni i boroczki sztudyntki ujrzały kupa czornych chopow, co sie im biołe ślypia a blade zadki świyciły! Dziołchy sie zwyrtły a zaś poleciały na skarga, ale żodnymu chopu nic za to niy zrobili, bo łone żodnego niy rozpoznały!
Po miesioncu taki praktyki, żodno stych dziołchow niy chciała już potym robić na grubie!
Komentarze