20041705
20041705


Jak żech sie bliżyj przisłuchoł i przipatrzoł tym cilipom, toch sie kapnył dopiyro, o co im idzie.Powiesiył żech nowy kadłubek zeszły tydziyń w ogrodzie na płonce z takom małom dziurom, żeby yno sikorka poradziyła do niego wlyźć. Okozało sie jednak, że jedyn cilip, taki jakiś mały oszkubek, na dokłodka bez łogona, poradziył sie przez ta dziura przeciś do tego kadłubka. Zaroz zaczon po dachu tyj nowyj chałupki skokać i wobić do sia samiczki. Wielce udowoł, że to jest jego chałupka i yno łon mo prawo rozporządzać, kero samiczka se łobiere na te pomiyszkanie. Co chwilka keryś inkszy samczyk chcioł na tyn kadłubek wyfiurgnyć, ale tyn oszkubany podciep był taki zadziyrny, że żodnego niy dopuściył. Jak yno kery siod na tym dachu, to zaroz go ściepoł, a potym gibko do pojstrzodka wlazowoł. Co wloz – z wielkom biydom sie mieściył – to dycko przi tym przeciskaniu juzaś jakiś nowe piorko straciył i coroz bardzij sie sagi robiył. To było taki komiczne, że jo stoł cicho jak trusia i zaglondoł, kiedy tyn gupek durch goły wyskoczy z kadłubka. Ale kaj tam, gizdowi rady niy było, durch te samiczki wobiył do środka. Byłoby to dobrze, keby sie keryjś udało, ale kaj tam, żodno wlyźć niy poradziyła. Za tłuste wszystkie były (chyba na fitness w zimie niy chodziły abo tyż te żarcie co jo kurom suja, za fest im smakuje).Co jakiś czas z tyj bandy na płocie jedyn cilip furgoł na kadłubek i zaroz nazod na płot, bo niy poradziył tego oszkubka odegnać. Trza tu pedzieć, że tyn gizd mały był taki szprytny, że jak widzioł niepeć, to zaroz do pojstrzodka budki sie wciskoł i konkurynt był darymny. Łeb yno wstyrczył do dziury i dalij niy poradziył wlyźć, coby tego oszkubanego podciepa wyforować. Reszta tyj bandy cilipiego rodu siedziała na płocie i kibicowała z takim zapamiyntaniym, ani te szalikowce na ważnym meczu. Szkoda, że człowiek niy rozumi tego ćwiyrkanio, bo na pewno by niyjedno usłyszoł. Myśla jednak, że jedna czyńść tych cilipow szła za jednym, a drugo za oszkubkiym, bo inaczyj by sie niy gławoczyły miyndzy sobom tak zawziyńcie na tyj swojij sztachetowyj „trybunie”.Niy wiym, jak długo by te haje tam jeszcze trwały, keby niy wszyndobylski kocur od somsiadki, kery prziszoł sie załatwić na mojij świyżo posiotyj grządce radiskow i cołki rozwrzeszczane towarzystwo luftnył prawie wtedy, kiedy oszkubek był w kadłubku. Za chwilka oszkubany cilip wyloz z kadłubka, wskoczył na jego daszek i zdziwiony na pewno, że wszystkich rywali przegoniył, paradowoł połsagi i głośnym ćwiyrkaniym wobiył nastympno kandydatka.Z drugij zaś strony żol mi było tego oszkubka, kery tak zabiygoł o wzglyndy jakijś wroblice, że możno to skuli „baby” te wszystki piorka straciył wroz z łogonkiym i stoł sie pośmiywiskiym cołkij bandy wypasionych cilipow.Mie to przipomniało zaroz nasze ludzki plymia, kere tyż sie wiela niy odkulnie od tych wrazidlatych wrobli. Na pewno tyż niyjedyn taki niewydarzony mały chopek, jak tyn cilipek, mo taki same problymy. Posztuchujom wszyndy, czynsto go wyśmiejom i ze wszystkich stron oszkubiom, że musi sie zadowolić potym tym, co tym mocniyjszym od gymby odpadnie.Chocioż niy zawsze sie to tak do końca wyglądo, bo znom takigo niyboroczka, że niyjedyn paker mu zowiści jego rozumu i powodzynio.Czasami jednak lepij mieć w łepie niż w musklach.

Komentarze

Dodaj komentarz