Wybier sie na rajza

Tak bez 50 lot nazod to do zwykłego czowieka był yno cug abo autobus, jak we tamte okolice kaj my chcieli jechać richtik kursowoł chociaż roz za dziyń. Szło tyż jechać koniym, ale trza go było mieć! Tak po wiynkszości to sie chodziło piechty czyli szłapcugiym. Pamiyntom jak żech roz jechała ze tatulkiym do Katowic (wtynczos sie jeszcze Katowice Stalinogród mianowały), to była wyprawa jak do Afryki! Nojprzod 4 kilometry wczas rano piechty na bana, tam trza było postoć ćwierć godziny za biletym, co my go potym musieli we Katowicach łoddać kolejarzowi z giwerym, co bilety przi dworcowych dźwiyrzach zbiyroł, nejści to był jakiś chop, jako to dzisiaj godomy: ze łochrony! Po drodze trza sie było na drab przesiadać we Orzeszu, coby nom katowicki cug niy uciyk, bo drugi był dziepiyro po połedniu. Nazod do dom jechali my autobusym, bo tatulek wyszpekulowoł, że to bydzie gibci, chociaż troszka droży! Caluśko droga musiałach stoć na tych małych szłapkach, bo autobus był fest nabity. Trzimałach sie tatulka za noga, coby mie kery kaj niy wycis, jak bydzie wylazowoł na swojim przistanku. A co żech sie nawoniała: stare łachy, smrodlawe fuzlapy a wymazane gutalinym strzewiki! Tako rajza to była prawo szkoła życio, a zebrała nom cołki dziyń, a przeca do Katowic je yno 40 km i dzisio to sie przefurgnie za niycołko godzina, no chyba , że som „korki”, to bydzie dłuży, ale żodyn auta pociepnońć niy chce!
Momy tyż przocieli we Australiji a to je dobrych pora tysiyncy kilometrów łod nos, ale łoni co drugi rok przilatujom fligrym do Polski. U nich tako rajza kosztuje tela co nowe auto, bezto kożdy rok ni mogom se na to pozwolić , ale nigdy niy lecieli dłuży jak półtora dnia! Nazod majom to samo: sztartujom ze Krakowa do nimieckigo Frankfurtu, dalij do Singapuru, a potym austalijskom liniom lotniczom prosto do dom.
Podziwejcie się jako je tym świat zrychtowany! Jakby kery hańdowni mioł tak wandrować, to by mu żywota na to niy stykło, a teroz siadomy do fligra, a za pora godzin som my na końcu świata!

2
Baner reklamowy

Komentarze

  • Grymlino. Elisabeth z Niemiec 24 września 2015 12:21Ciesza sie, że te moji pisani czytocie, a że my sie bezto tak troszka skamraciły!Dziynkuja serdecznie za te roztomańte tymaty, co mi ze serca podpowiadocie! Pozdrowiom
  • Elisabeth Reise-rajza.... 23 września 2015 21:14to mocie-recht Grymlino,jak sie to wszystko na drabko pozmienialo.Roz dwa som my na koncu swiata-a jo tez pamientom czasy-jak sie jechalo z Rydultow do np.Rybnika po szczewiki abo nowy mantel-to tez sie bylo we swiecie.A jo miala ciotka w Katowicach,a jak my tam na bezuch przijechali,to my sie mysleli,kandy my to som we swiecie.Abo do Raciborza-tam sie przewaznie "szprechalo"a szwandrosilo po niymiecko-/lata60-70/-to tez bylo cos.A jo zawsze chciala jechac do Zor,se te stare miasto pooglondac-ale z Rydultow a bez auta to bylo unmyjglich/unmöglich-niemozliwe/.A teraz to bele kandy sie rajzuje....jakby to tak Kolumbus wiedziol,toby sie borok nie musiol tak dlugo po tym Atlantyku tym szifem czojdac. A najbardziej mi sie podobalo slowo-gutalin!Stare wspomnienia i rodzinna mowa.Pozdrowienia i czekam na dalsze-szkoda,ze ta drugo-publicystyka z regionu-zawsze troche sie spoznia.

Dodaj komentarz