Ujek kupił se króliki i musioł ich czymś futrować, bezto najon se konsek mokrej łonki wele stawu Śmiyszek. Siana wiela śni ni mioł, ale jednego roku poszczyńściło mu sie i znod tam gniozdo łod dziwoki kaczki. Były w nim jajca i łon ich do dom zebroł a posadził na nich kura, co prawie zaczła kwukać. Za pora dni wykluły mu sie małe taśki, isto już delszy czos ta dziwoko kaczka musiała na tych jajcach siedzieć! Kaczki dobrze sie chowały , yno dugo były taki niywielki, bezto ujek pytoł naszego starzyka, co był fesztrym, coby sie na nich podziwoł. Starzik zaroz padoł, że to je tako drobniyjszo zorta kaczek, a ujek by sie niy mioł żodnymu kwolić, co ich mo, bo łone były bez wiynkszo czyńść roku pod łochronom, ale ujek go niy posłuchoł i za kwila wszyscy nałokoło wiedzieli jako zocno zorta kaczek tyro po jego placu! Prziszoł se ich tyż łobejrzeć nauczyciel ze gimnazjum, co sie ptokami a myntlami rod po robocie zajmowoł. Łon radził gospodorzowi, coby nad placym jako siatka rozciongnoł, bo mu sie inakszy te kaczki luftnom, ale ujek mu łodpedzioł, że łon pryndzy ich wypasie, a potym do garca wsadzi.
Prziszoł podzim, a potym chycił leki mroz, a kaczki dalij po placu łaziły i ujkowo babeczka Ruzala doszła do tego, że musi sie im u nich fest podobać, no bo po prowdzie, kaj by sie tak dobrze miały: żarcio przeca połne korytka majom? Pomału łoba z ujkiym we te godki sami uwierzyli, ale jednego dnia kaczki zaczły sie cosikej nerwować a dziwacznie skokać i ujek kozoł ich ciotce Ruzali zagnać do chlywika, bo im jednako niy dowiyrzoł. Kej łona wylazła na plac, posłyszała jakiś głośne krakani, to łod klyszczowskich stawow leciały dziwoki kaczki a pruły prosto na połednie. Na ciotczynych łoczach jeji wychuchane kaczki sie zakrynciły po placu a poszły za nimi i tela ich widziała, ale na drugi rok pora razy na jejich plac przileciały jakiś frechowne, dziwoki kaczki a wszystek kurom ze korytek wyżarły! Isto to musiały być te jejich wychowanice!
Komentarze