Kaj kupić dobre jodło

Łostatnimi czas bryle do sklepu biere, chociaż kejś to mu sie niy zdorzało! Downi jak żech mu przedciepowała, że czego niy doczytoł a przinios mi do dom sama chymijo, to mioł gotowo łodpowiydź: te gizdy to takimi maluśkimi literkami piszom, coby klient tego rychtik niy doczytoł! Musza mu przyznać, że pisoł kaj sie yno dało, coby to zmiynili i musiało być wiyncy takich niyzadowolonych kontmanow, bo ustawa w końcu wyszła, ale te literki ze informacyjom ło towarze wiela wiynksze niy som!
Nojgorsze, że teroz we kożdym jodle, cosikej takigo je co ludziom szkodzi: konserwanty, coby towor mioł rok ważności, azotyny we miynsach a wusztach, glutasol, co to niby robi lepszy smak, we monce antyzbrylacze, we nudlach – farba, coby piykne żółte były i tak by my mogli dugo jeszcze mianować, ale czasu szkoda na taki lamyntowani! Możnej, że kery, co to czyto, już sie na mie wnerwił: Jak żeś je babo tako wymyślato, to kupuj yno „żywność ekologiczno”!
Ale stym tyż je roztomańcie, bo na takim jodle miało by pisać „bio” a niy „ekologiczno”. Tak mi kamratka padała, co sie na tym zno, bo we laboratorium, co sprawdzo jakość żywności robi! Jo i roz padała, że se na swoji zegrodce jarziny naflancuja, to byda mieć „bio”, ale łona mie łostrzygła, cobych tego ani niy próbowała, bo u nos na Ślonsku ta nasza ziymiczka momy tak fest tom chymijom przyńdziono, że pryndzy bych se na zdrowiu zaszkodziła! Sami widzicie tela syra – wiela masła!
Dugoch nad tym myślała i w końcu prziszłach na to, że świata to jo niy zbawia, ale cosikej bych mogła chociaż do swoji familiji zrobić! Monka reżno sama kupuja a żur sama kisza, jak co piecza, to szukom monki „bez dodatkow”, jajka biera łod gospodorza ze wsi (i tu musza przyznać, że to je wielgo rożnica!), a roz we tydniu kupuja mlyko prosto łod krowy. Po chlyb chodzimy yno do piekarnie, co polepszaczy niy dowo, zatym chociaż tela zrobić moga!

Komentarze

Dodaj komentarz