Som uznoł, że to je yno śnik, bo łon już przeca był żonaty, a babie a swoim dzieckom przoł, ale wszystek spełniło sie do roku. Na podzim jego babeczka robiła porzondek i chociaż już była na łostatnich nogach, na drabina wlazła, a potym śni śleciała! Łod tego czasu wiela już niy pożyła. We chorobie doglondała jom siostrzynica (kuzynka), co była już lata wdowom! Dziecek swoich ni miała, a chciała familiji pomoc. Coby być bliżyj przocielki, co i przoła jak siostrze, sprzedała gospodarka we swoich stronach, a kupiła gryfno chałpa z polym praje we drugi wsi. Po przepisanej żałobie chop sie śniom łożynił i dobrze zrobił, bo drugo matka łogromnie do dziecek dobro była. Moja starka wiedziała to na isto, bo z tej familiji starczyno ujna pochodziła!
Jedna somsiadka miała wele chałpy konsek pola, a sadziła na nim yno jarzina. Bez lato i trocha na torgu uprzedała i potym miała pora groszy na zima. Roz, we Adwyncie śniło sie babie, że niyskoro na podzim na tym polu kopała i ze ziymie wykulła sie tako bryła, co w ni cosikej było, ale co tego niy wiedziała, bo sie łobudziła! Rozprowiała ło tym ze starczynom mamulkom i łobie uznały, że to był yno gupi śnik! Jednako somsiadce cosikej niy dało pokoj i na te pole poszła. Roz kopła kopaczkom i wykulła sie i tako bryłka jak we tym śniku! Łona jom zaniosła do rechtora. We ziymi były były jakiś stare zaruściałe piniondze! Za pora dni tyn chop pojechoł ze somsiadkom do muzeum do Bresłau (Wrocław), a tam baba „znoleźne” dostała, a zima przeżyła bez starości.
Inkszymu chopu śniło sie roz we Adwyncie, że szeł bez jakiś wielgachne pole, łod lasa wyleciały na niego dwa wilki i chciały go żeżrać! Łon sie uchycił nojbliższyj sośnice, a na rynkach podciongnoł sie do wiyrchu, ale jedyn wilk go za noga chycił... Tyn śnik spełnił sie dziepiyro bez drugo wojna. Tyn chop dostoł sie do ruskij niywole, jak prziszoł nazod to jedna stopa mioł przegryziono, jak we tym adwyntowym śniku!
Komentarze