Sznita ze fetym po chińsku

Nasi już tam byli, to im teroz wypadło Francuzow na byzuch zaprosić. Jednako łoni chcieli, coby tako prawo zima a śniyg łoboczyć, bo se myśleli, że u nos musi być jak na Syberyji. Kamratka łobjaśniła ich zaroz, że u nos czasym je tako ciepło zima jak we Italii i na śniyg a mroz ni ma co liczyć, ale potym prziszło ji do gowy, coby popytać ich na Adwent., bo choćby tyj prawej zimy niy było, to miasta a wsie som piyknie postrojone. Do Krakowa Francuzow mioł zawiyźć som panoczek fojt, a łona łobiecała im, że ich weznie do kościoła na roroty. Tego zwyku we Francyji niy znajom. Nojwiyncy sie im widziały dziecka, co szły tak wczas rano do kościoła ze lampionami, a cołko droga śpiywały! Te śpiywani załatwiła cera łod kamratki, bo rozgodała kamratom we szkole, że kożdy bajtel, co śpiywoł bydzie po drodze, to łod jeji mamulki czekuladowy baton dostanie i na drugi dziyń kościoł był połny. Mamulki troszka to kosztowało, ale honor gminy był uratowany! Był jeszcze jarmark , kaj se goście roztomańtych pamiontek do dom nakupowali, a na koniec zażyczyli se jeszcze coby paniczki urzyndniczki uwarzyły jaki prawe ślonski jodło. A to im klina do gowy zabili! Ze poczontku dziołchy rychtik chciały cosikej uwarzić, ale niy miały kej, bezto pon fojt padoł tak: kupcie frelki dobry chlyb, nolepi pora pecynkow, przirychtujcie dobrego fetu, a ku tymu ze trzi krałzy kiszonych łogorkow, a ło troszka gorzołki to jo sie som postarom!
I tak łostało. Szpyrka dziołchy kupiły, ale kero jom miała wyskwarzić, przeca musiały iść do fryzjera, coby gości niy straszyć? Jedyn kamrat ze biura wymyśloł, coby dać robota „chińczykowi”, co wele urzyndu mioł budka. Upewnił sie , eli go „chińczyk” dobrze zrozumioł, a padoł, że przidzie po tyn fet poł godziny przed imprezom i tak zrobił, ale zaroz sie za gowa chycił, bo fet był wrzawy, jednako moja kamratka uratowała sytuacyjo, bo wsadziła garniec do śniega, co praje we nocy spod! Impreza się łodbyła, Francuzi byli radzi a zaś by z miłom chynciom przijechali!

Komentarze

Dodaj komentarz