Juzaś momy nowy rok na karku

Już we Adwyncie nasze dziecka kupowali abo robili jaki małe gyszynki, podle tego wiela piniyndzy uszporowali, i tak łostało do dzisio! Na poczontku grudnia jo tyż sie dycki za podaronkami łoglondom, a kożdy rok musza ich kupować wiyncy. Nojpiyrw prziszła ku nom niywiasta – baba łod mojigo syna, łogromnie fajno dziołcha, a łońskigo roku przibył ziyńć, co sie tyż śnim dogodać idzie! Ło wnuczce toch Wom już pisała (siedym lot i bydzie) a terozki momy jeszcze dwa synczyska, we takim piyknym wieku, bo im jeszcze ani roczek ni ma, napyskować niy poradzom a dycki sie łośmiejom jak babcia abo dziadka widzom! Momy tyż kamratów a kamratki, co nom każdego roku jaki gyszynki robiom i takich znajomkow, co sam na Ślonsku żodnego ni majom. Przidzie Wilijo, potym zmignom te dwa dni świont, bo sie kaj do przocieli idzie, a zaś momy nazod to, co przed świyntami, czyli tyn szary „kożdydziyń”, yno jeszcze do Sylwestra jo małokedy łobiod warza, bo dycki tam cosikej we zamrażarce łod świont łostanie. Do mnie to som te nojpiykniyjsze dni, bo mom czas spotkać sie ze ludziami coch ich downo niy widziała, ale tyn rok to isto niy bydzie tak prosto, zdrowi mi niy dopisuje, bezto na daleki rajzy sie niy wybiyrom. Moji znajomki a przociele tyż sie starzejom i wyglondo to tak, że łostatnimi czasy wiyncy klachomy bez telefon, niż sie widzymy, ale dobre je i to, bo jedyn drugimu do znać, jak tam u niego je!
Pora lot nazod skamraciłach sie z jednom dalszom przocielkom, co sie mianuje Lisbeth. Łona miyszko we Niymcach i po naszymu wiela niy poradzi, a jo niy umia przeboleć, że se poklachać niy poradzymy. Ale na to tyż je rada: jo zadzwonia do drugi kuzynki, co wiyncy po ślonsku godo, a łona to potym dali przekoże, bo wszystek sie do zrobić jak sie yno chce!
Jo żodnych wielgich planow na nowy rok niy robia, ale chciałabych na bezrok do Was, roztomili czytelnicy jeszcze pisać, bo my sie za tych łostatnich siedym lot fest skamracili i dycki ciepło ło Was myśla, bezto życza Wom Szczyńśliwego Nowego roku 2016!

2

Komentarze

  • Grymlino. Do Elisabeth 31 grudnia 2015 17:23Dziękuję za życzenia noworoczne. Niedługo ukaże się opowiadanie o znakach wieszczych z 1913 roku, oparte na opowieści Pani babci, zapraszam więc do czytania naszych artykułów o śląskich straszkach i serdecznie pozdrawiam
  • Elisabeth dziekuje ..... 23 grudnia 2015 20:36Pani Grymel...za te wspaniale opowiadania i geszichty po polsku i po naszymu-zawsze ciesze sie na "cos nowego"-dzieki Pani te opowiadania zostana -zyjace-i przekazane nastepnym pokoleniom. Zycze Pani wesolych,pogodnych Swiat i wszystkiego dobrego w Nowym Roku. Zyczenia wesolych,pogodnych Swiat i pomyslnosci w Nowym Roku dla calej redakcji Nowin!

Dodaj komentarz