Bogaty abo majyntny

Musza sie Wom przyznać, że jakbych miała piniyndzy zatela, tyż bych niy wiedziała, co śnimi zrobić, bo pomyślonku do biznesu to jo ni mom! Miyszkać mom kaj, to bych se możnej jaki remont zrobiła, nowe noczyni kupiła, dzieckom bych dała wiela by potrzebowali, troszka wsadziłabych do banku na nauka do wnukow, ale co wiyncy bych mogła zrobić, to mi do gowy nic niy przichodzi! „Dacze” se niy kupia, bo kery tam bydzie robił? Mogła bych tyż biydokom pomoc, ale kery biydok sie przizno, że ni mo co do garca wsadzić? Ci co gośno ło swoji biydzie wrzeszczom, to chcom na ni interes ubić, a tego to jo ni mom rada! Tak se myśla, że jak pomogać, to nojlepszy jednymu, konkretnymu czowiekowi, a dać mu to, co mu sie rychtik przido. A jako sami wiycie, piniondze ni majom wiecznego żywota, przidzie inflacyjo, a je po nich! Tym ze piniondzami dzisio je bogocz, a jutro może być żebrok!
To już isto je lepi być czowiekiym majyntnym, czyli takim, co mo majontek, ale ze tym tyż roztomańcie było! Nikerzi mieli chałpy, zomki i młyny, a biyda klepali, bo im te wszyski majontki piniyndzy żodnych niy przinosiły! Co stego, że tam nikery mioł gospodarka, jak na ni niy robił? Zodnymu niy zowiszcza, bo coby cosikej mieć, to sie trza narobić, same nic ze nieba niy spadnie!
Jedyn znajomek łod moich łojcow, to był chop ze gowom do interesu, uskłodoł troszka piniyndzy, a potym kupił tanio doś pora jutrzin pola, co lata całe ugorym leżały, bo żodyn ich niy chciał! Były to taki bagnite łonki a gorki piochu, bezto wszyscy sie śniego śmioli, bo stym niy szło nic zrobić, ale łon jednako dobrze szpekulowoł, bo za pora lot tam postawili droga a dobrze mu zapłacili, ale co by sie stało, jakby sie te plany zmiyniły? Jo se myśla, że łon dali by był majyntny, yno niy bogaty! Podle tego widza, że nojlepi je być troszka majyntny a troszka bogaty do kupy, a Wy co se ło tym myślicie?

Komentarze

Dodaj komentarz