Przisłowia ło klachach

A że mom prawie, to sie przekonali we naszyj familiji. Jak żech była maluśko (we 50 a 60 latach), to mój tatulek wiela niy zarobioł, bo taki czasy były, ale moji lojcowie sie nikomu niy uskargowali, yny żyli stego, co mieli! Jedna łogromnie ciekawsko baba nic niy wyciongła na tyn tymat łod moji mamulki, to szła z ciepłym ku mojimu tatulkowi, a pytała sie go wiela zarobio? Faterek chciał i co na rozum pedzieć, ale sie shaltowoł, bo łona doś staro była, a łon niy rod takim omom pyskowoł, bezto i padoł tak: moja baba sie niy uskarguje na to wiela prziniesa, za to dobrze se to podzieli a na wszystek i styknie! Tatulek chciał nasza mamulka pokwolić, że je tako gospodarno, ale jak sie potym łokozało, ta baba spokopiła to troszka inakszy, a narobiła łostudy!
Zaczli ku nom chodzić ludzie na pożyczki, ale jak mamulka padała, że ni mo ze czego pożyczać, to jom pora razy te znajomki sprzezywali, że je chamiato, a biydokom pomoc niy chce! Żol i było jednako tych boroków i chciała ich spomoc chociaż konskiym chleba, co my go sami wtynczos zatela ni mieli, to jedna baba i padała, że łona ni ma żebroczka i jak i piniyndzy niy pożyczo, to se chlyb może wsadzić... Wtynczos moja mamulka sie rozgorszyła a rozpłakała, bo przeca łona chciała dobrze, a skond sie tela tyj złości we tych ludziach brało ni miała pojyncio!
Downi to sie dugo stoło we raji za miynsym. Wtynczos baby rade klachały, a jedna spytała sie kejś moji mamulki , eli by szła do roboty do sklepu, kaj robiła przodzi niż sie wydała?
– Toć bych szła, ale ni mom kaj dziecek lostawić! – łodpedziała zgodnie z prowdom mamulka.
A te babsko yno na to czekało a wsiadło na nia z wiyrchowiska:
– Jak wy byście szli do roboty –wrzaskła – toby kożdo baba łod derektora tyż musiała robić, bo wasz chop tak dobrze zarobio, że wom na wszystek styknie!
– Kery wom takich gupot nagodoł paniczko?! – dziwowała sie mamulka.
– Jo to wiy łod jednyj istnej, co to słyszała z gymby łod waszego chopa!
I mamulka była noreście w doma!

2

Komentarze

  • Grymlino Do pani Elisabeth 10 marca 2016 13:00Dziękuję serdecznie za komentarz, opisaną sytuację potrafią zrozumieć tylko ludzie, którzy się z takim chamstwem zetknęli! Najgorsze jest to, że ci, którzy tak nagannie się zachowują, nie mają z tego żadnej korzyści, ot, takie "polskie piekiełko": nie wychylaj się bracie /siostro/, bo my i tak cię ściągniemy za nogi do kotła z powrotem i przywołamy do porządku!
  • Elisabeth komu wygodzisz,sobie zaszkodzisz- 09 marca 2016 19:56tak to bylo kiedys i zostalo do dzisiaj.A ciekawe babska-to fora ze dwora-tak bych to zrobila.Bo jak Wy Grymlino to opisujecie-to jest rychtyg prowda-az zechsie znerwowala skwuli takich ludzi.Fajne i z zycia wziete opowiadanie-!

Dodaj komentarz