Co synczyska poradzili we szkole wystrugać

 

Teroz Wom łopisza jako to było za czasów mojigo tatulka, co chodził do szkoły (tyj podstawowej) jeszcze za „starej Polski”.


 

 Mieli tam jednego rechtora, co uczył dziecka łogromnie nowomodnie, bo godoł, że chce ich nauczyć myślynio!
Jedyn roz prziszeł rano do roboty a zaroz na piyrszej lekcyji padoł, że jak szeł wele bany, to stoł tam cug a na nim były załadowane zwiyrze ze cyrku, ale bajtlom zakozoł tam lecieć, a dobrze wiedzioł, co robi, bo jak zakazujom to łebonie tam ekstra polecom, coby na skwol co nabzdurzić!
– Po lekcjach se łobejrzycie! – padoł jeszcze, łośmioł sie, a wzion sie za uczyni matymatyki.
Mojimu tatulkowi to dało do myślynio, bo coś mu tu niy sztimowało, przeca tyn rechtor ni mioł to po drodze, bo miyszkoł na drugim końcu wsi, a po drugi po co by szeł tak wczas rano na banhof, jak tam kasowe łokiynko łotwiyrali dziepiyro ło dziesiontej? Jednako tatulek łogromnie chciał widzieć elefanta, a ciekawość przewożyła! Po cichutku wyloz ze klasy a pognoł prosto na bana, a było tego ze łoziymset metrow, a tam były yno prożne glajzy! Bezto poszukoł kolejorza a spytoł sie, eli tyn cug rychtik dzisio był?
– A czyś ty gupi synku, sam nic niy było, nejści tyn wasz rechtor wos nabroł! – łodpedzioł kolejorz.
We moim tatulku aż sie zawarziło: Łon taki szprymok tak gupie doł sie chycić?! Zwyrtnoł sie na piyncie a wiela sił we nogach polecioł nazod do szkoły! Po drodze potkoł dwóch kamratow, a padoł im co a jako sie mo! Łokozało sie, że cołko jejich klasa doczkała yno do pałzy, a potym wszyjscy (dziołchy a synczyska) polecieli na banhof, yno te trzi gizdy po cichuśku wleźli do klasy, a twardo siedzieli we ławkach, ale za ćwierć godziny reszta tyż była nazod, bo sie kończyła pałza. Przed szkołom jednako stoł pon rechtor a liczył gupielokow, co sie dali nabrać! Yno tych trzech szprymokow, co byli pryndzy nazod, pokwolił, ale tu sie łoszydził, bo jedyn ze tych szprymokow (mój tatulek) isto był nojgupszy, bo był na banhowie piyrszy!
Jo se myśla, ze ta rechtorowo metoda niy była do końca dorobiono, bo zamiast myślynio nauczyła bajtli cyganiynio, a Wy, co myślicie, roztomili Czytelnicy?
Grymlino

Komentarze

Dodaj komentarz