Piykno godka na Wielkanoc

Niy widziało sie to jednymi papiyżowi, co mu Sylwester było na miano i łon te wszyski straszne stwory przeklon a zawrził we ciymnej piywnicy kajś we Watykanie. Dwa nojgorsze chachary, co tam siedzom to som smok Lewiatan a som Szatan. Oba som fest do watykański skały przikute i przed końcym świata na wiyrch niy wylezom!
Szatana papiyż Sylwester przikuł hrubym lańcuchym, co mo tyla łoczek wiela je dni we roku, a padoł mu, że bydzie mog wylyź na wiyrch, jak do Wielkanocy te łostatni, nojhrubsze kołko zymbiskami przegryzie, bezto tyn gizd sie staro jak może, a dni se na tym lańcuchu łodliczo. Już pora razy był tak daleko, że yno stykło jeszcze pora razy zymbiskami pobrusić, a byłby na swobodzie, ale zrobił to troszka niyskoro, bo jak na ziymi ludzie zaśpiywajom „rezurekcyjo”, to tyn lańcuch sie slepio nazod, a Szatan musi brusić łod nowa. I tak to już trwo bez tysionc lot! Jak yno dzwony we Wielkanoc wczas rano zabijom, coby łogłosić Zmartwystani Pański abo ludzie zaśpiywajom jako pieśniczka ło Zmartwystałym Ponboczku, to sie zaroz cołki piekło zatrzyńsie a diobelski lańcuch nazod slepi!
Jak żech ło tym kejś bojała swojim dzieckom, co wtynczos jeszcze mali byli, to łoni hnet prziszli na to, że tyn Szatan musi być fest gupi, bo by stykło przegryź kere myjsze a ciynksze łoczko, a na to samo by wyszło! Możnej, że nasze dziecka mieli prawie, ale może tyż być we tym jaki hoczek, na przikład te maluśki lańcuchowe ringi sie przegryź niy dajom, bo som fest twarde? Tego to żodyn niy wiy, bo dioboł jeszcze niy probowoł! Możnej ta bezkurcyjo ni ma tako gupio, jako se myślymy? Bo lepszy je zymby mieć i wylyź choćby za tysiąc lot, niż se ich połomać i na wieki we tym watykańskim lochu łostach! My sam za tym gizdym niy płaczymy, bezto niych tam siedzi jak nojdłużyj!
Wom Wszyskim życza Błogoslawionej Wielki Nocy!

Komentarze

Dodaj komentarz