20043605
20043605


Za bajtla mie niyroz osy, pszczoły, ćmiyle i szarszynie poszczypały, ale jakoś nic sie niy stało. Roz mie aże dwa szarszynie użądliły, jedyn w gynik ze zadku, a drugi w czoło, gynał miyndzy ślypia. Pysk mi spuchnył cołki, a tu za dwa dni feryje sie kończyły i trza było do szkoły iść. Oczy mi cołki zapuchły i zacisło, że yno przez taki szparki żech patrzoł. Wyglądoł żech ani mały mongol, żodno rechtorka mie niy poznała, a dziołchy sie chichrały, co yno na mie wejrzały. No ja som żech se był tymu winiyn i yno żech sie pocieszoł tym, żech niy był som taki spuchnyty. Stanik i Zefek tak samo wyglondali. Jak to sie stało? Zwyczajnie. Przi drodze paruszowskij w Wielopolu nad Rudom stoły stare dymby i w jednym z nich ujrzeli my dziubla, z keryj wylatujom i wlatujom szarszynie. Pod samym dymbym była wyjeżdżono ściyżka przez ludzi, kerzi jeździyli niom do Huty Silesia na kołach. Zaroz nom prziszło na myśl, żeby te szarszynie poburzić, jak bydymy widzieć z daleka ludzi jechać na kołach z roboty. W trojka my sie zaczajili w krzokach niydaleko tego dymba ze szlojdrami narychtowanymi do strzylanio w ta szarszyniowo dziubla. Zefek piyrszy ujrzoł nadjyżdżające trzi baby ze wsi, kere w emaliyrni na Silesii robiyły. Toż my gibko zaladowali kamiynie do łatki i zaczli jedyn po drugim strzylać ze szlojdrow. Nie było to tak łaps trefić, toż Stanik padoł: idymy bliżyj, synki! Podeszli my na jaki sztyry metry od dymba i zaczli my grzmocić do tyj dziuble. Wyparziła śnij zaroz banda szarszyni i prosto na nas walom. My tyż nic, yno zwyrt i kalup my sorkali ku tym krzokom. Nic niy pomogło, dopadły nos i dostali my za swoje. Zefka użądlił jedyn w ucho, drugi w lico, Stanika yno jedyn, ale za to w dolnio warga, no a mie – to już wiycie. Co jedyn bardzij wrzeszczoł i lamyncił. Dwie godziny moczyli my te obolałe miejsca w Kamionce, co do Rudy wlatuje. Jak mie mama ujrzała potym, to nie wiedziała, co począć, ale sąsiadka doradziła, żeby mi okłady robić szmatkom zatonkanom w kiszce, co mi fest pomogło. Dostali my porządno nauczka i jak żech już wspomnioł, do szkoły my prziszli co jedyn to bardzij opuchnyty.
Baner reklamowy

Komentarze

Dodaj komentarz