Ciynżki, ciynżki stan małżyński

 

Po naszymu


 

Nasza starka dycki godali tak: Ciynżki, ciynżki kamiyń młyński, a ciynżyjszy stan małżyński! Jak sie kero dziołcha takigo lamyntowanio nasuchała, to sie ani potym wydować niy chciała, chocio jōm ôjcowie fest do tego namowiali! Drugi dziołchy, to se zaś nic ze tego niy robiły, bo cołki czos, ôd wczaśnyj modości rzykały do świyntego Jopa ô dobrego chopa i na takigo fest rachowały! Te starszawe frelki, co broczy ni miały, to tak rzykały do świyntego Mikołoja: Choćby ło jednym ôku, bele tego roku! Jo myśla, że już styknie tego szpasowanio, a terozki to my se na poważnie pogodōmy!

Krosa dycki była ważno , bezto niy dziwota, że te nojmodsze a nojgryfniyjsze frelki dycki pryndzy brocza znodły niż te starsze, co jeszcze ku tymu "krosōm niy grzyszyły", ale nojważniyjsze dycki we tym wszyjskim było dziołszyne wiano. Kożdy synek chcioł wiedzieć, wiela modo ze chałpy dostanie piniyndzy abo pola, bo ze tego było użyci, a ôjcowie ôd dziołchy tyż byli ciekawi, eli tyn mody ku nim niy przidzie z gołōm d...! Jak sie niy dogodali, to nic ze żyniaczki niy było! Jak kero frelka była biydniyjszo, to ani wiela przebiyrać niy mogła, bo chopōw zdatnych do żyniaczki dycki było myni niż dziołchōw, co by sie rade wydały.

Hań downi to ludzie zwalali na ciynżki czasy, godali że to je wszyjstek skuli wojnōw, że tam niby dycki tych modych chopōw wybijōm, ale eli je to prowda? We tych dobrych a spokojnych czasach sie tyż nikerzi synczyska niy żynili, a karlusami byli aż do samej śmierci (isto sie babōw boli!). Jeszcze inkszy do zakonu na fratra se poszoł, abo na ksiyndza sie wyuczył, bezto dziołchy musiały sie do tego wydoju śpiychać, a potym czynsto lamynciły, że sie źle wydały, bo jejich chop rod wypił, baba proł, roztōmańte breweryje wyczynioł, a dziecka doôkoła chałpy przeganioł! Czasym sie im tyż chop -niyrobisz, abo lyń trefił, ale jak kery był dobry, yno dupiaty, to zaś go baba niy szanowała! Sami widzicie tela syra wiela masła!

Samymu je ciynżko we żywocie! We dwōch je bezmała lepi, bo dwie gowy sōm do myślynio, ale tyż do rzōndzynio, a to już je troszka gorzi, bo jak sie trefiōm taki dwa kōniczki, co to jedyn ciōngnie "hetta" a drugi "cichi", to sie niy dogodajōm, yno se na bzdury robić bydōm!

GRYMLINO

2

Komentarze

  • Już wolny. Po naszymu. ciynżki stan .... 15 lutego 2017 16:00Prowda pisze, baby by chciały mieć doma dinera ( służącego) z pynsjom dyrechtora banku. I jak stoło w "Nowinach" jak w niekierych krajach Afryki , tyż poznowomy swoja baba dopiero po ślubie.
  • ano mom cie rod 09 lutego 2017 10:55same heheszki,hahaha

Dodaj komentarz