Po naszymu
To sie przidarziło jeszcze za Wilusia. Za bajtla nasza starka Paulka mało do szkoły chodziła, bezto sie po nimiecku godać a pisać niy nauczyła. Jak sie wydała za starzika Karlika, to ôn ji wiela razy godoł, coby sie miała jednako chociaż troszka po tym nimiecku nauczyć, toby sie im lekcy żyło, boby umiała pogodać ze byamtrami, ze farorzym abo ze rechtorym i Karlik by niy musioł sōm wszyndy lotać, ale ôna dycki godała swoji, coby "te bismarki mieli sie nauczyć po naszymu, jak sam ku nōm prziszli"!
Skuli tego były roztōmańte breweryje: nikedy do śmiychu, ale tyż roz za czos do rozpłaczu, bo Paulka co przekrynciła, abo źle porozumiała. Bo przeca nōm, Ślōnzokōm, spokopić ta twardo nimiecko godka niy było leko! Jedyn roz starzik ze starkōm jechali fōrōm do dōm ze torgu we Rybniku i przibrali jejkowskigo szandary ze babōm. Szandara siod se ku starzikowi na przodek, a szandarka ku starce na zadek. Jak sie dwie baby potkajōm to se dycki troszka poklachajōm, chocio sie ani wiela niy znajōm, a kożdo godo po swojimu. Starka już pora razy szandarki we kościele widziała, bezto zaczła ji kwolić piykne szaty a kobuk, bo ta baba "po pańsku" sie ôblykała, a nasza starka "po chopsku" chodziła.
Starka przestrojić sie niy zamiarowała, bo sie boła, że bez zima zmarznie we takich ciynkich keckach. Ô dziwo, szandarka wszystek rozumiała, piyknie sie ôśmioła, a padała ;"danke", a co te słowo znaczy, to Paulka wiedziała! Tak sie baby rozgodały, że prziszła raja na gospodarka, ale tu już starka Paulka ani wiela niy rozumiała. Ôroz ze tyj cołki godki uchyciła jedne słowo: "gluke", co se przełożyła na nasze , a wyszło ji ze tego, że szandarka chce pożyczać kluka, bezto zaroz padała: Ja mōmy, mōmy, mōmy za stodołōm! Szandarko chcecie gōwna ze hajźla wyciōngać abo gnojōwka wylywać, bo niy wiym, kero mōm wōm dać? A pokozała rynkami jaki wielgi garce majōm ôbie kluki.
Wtynczos szandarka zgupiała, bo niy wiedziała, co Paulka chce, przeca ôna sie ji yno pokwoliła, że se kwōka (po nimiecku:Glucke) na jajca nasadziła! Starzik Karlik śmioł sie, aże mu płaczki po gymbie leciały, ale coby sie szandarka na nich niy pogorszyła w migu jōm ôbjaśnił , ô co szło jego babie!
GRYMLINO
Komentarze