Dziyń Chopōw abo mynczynnikow?

 

Po naszymu
 

– Nasza stareczka godali tak – padała mi roz moja kamratka – że baby majōm yno jedyn dziyń we roku, co se mogōm troszka pofolgować, a chopy, te gizdy, świyntujōm cołki rok, a jeszcze sie za mynczynnikōw majōm, bo se śwynto we szterdziestu mynczynnikōw naznaczyli!

Bo tyż troszka prowdy we tyj godce ôd starkōw je! Chopy sie dycki kożōm ôbskakować: jak taki jedyn ze drugim do dōm po robocie przidzie, to ōbiod chce mieć nawarzōny, koszule pobiglowane, strzewiki naszwarcowane, fuzekle posztopowane ( na te szczyńści teroz już tego niy trza robić!), łachy wyprane, na drugi dziyń przirychtowane czyste galotki, abo spodnioki a czysto tresa! Wiela by my tak mogli jeszcze wyczytować...

Ze takim prawym chopym je wiyncy roboty, jak ze maluśkim bajtlym, ale ze drugi strōny, jakby sie trefił chop niydbalec, to je jeszcze gorzi: trza go naganiać do mycio, do golynio, dać pozōr coby koszule, majtki a fuzekle zmiynioł! Kejś to starki godały, że lepszy je ôżralec niż niydbalec! Tak było za naszych starkōw, a jako je terozki? To by my sie musieli spytać tych modych babeczkōw, a posuchać, co godajōm.

Terozki to je troszka inakszy, chopy rade sie myjōm sami, a bez naganianio, ale niy skuli tego, że tak swoji babeczki abo mamulki radzi posuchnōm, ale bezto, że sie bojōm, coby ich we robocie palcami pokazowali, a ôstrzygali jedyn drugigo, że tyn istny chop śmierdzi! Bo tyż po prowdzie ni ma dzisio na co zwalić, bo woda a łaziynka we chałpie skoro kożdy mo, tych wōnideł, fukadeł a mydeł roztōmańtych tyż we kożdej drogeryji i je aż zatela, pralki a proszki do pranio tyż sōm, bezto chodzić zmazany abo niyumyty to je gańba! I zaś my tego tela nawymiyniali, jako widzicie!

Eli downi abo i jeszcze dzisio, chop je dycki procne stworzyni a wiela z użyry a babskigo zdrowio kosztuje! Bezto wiela razy my baby na tych naszych chopeczkōw utyskujymy, uskargujymy sie kamratkōm, co tyż takich samych panoczkōw w dōma majōm, ale jednako myślymy se czasym, że bez nich by nōm było markotno (bo kery by nos gorszōł krōm dziecek?), a same by my żyć musiały.

Bezto niych nōm te nasze tatulki, chopeczki, ujki, starziki, synki a braciki żyjōm jak nojdłuży. Wszyskigo Nojlepszego!

GRYMLINO

 

PS: Dziękuję panu Alojzemu Zimończykowi za pomoc w śląskiej korekcie.

Komentarze

Dodaj komentarz