Jak chycić zajonca?

 

Po naszymu
 

U nos Zajōnczek po zegrōdkach gniozdka ze słodkimi jajuszkami do dziecek robi, a przinosi tyż inksze malutki gyszynki, roz sōmsiadowymu wnuczkowi sie we takim gniozdku maluśki traktor wylōng. Syneczkowi sie ze poczontku fest spodoboł, ale potym graczka poszła we zapomniyni, bo rosnōńć niy chciała , a styjc była tako sama! Naszyj cerze, jak była mało, to zajōnczek gniozdko ze szekuladowymi bōmbōnami na strōmie powiesił, isto musioł wiedzieć, że nasz kocur mo ich rod, a pokōj by im niy doł!

No, to my se troszka poszpasowali, ale teroz pogodōmy cołkiym poważnie: Nikery by na Wielkanoc tego zajōnczka upiyk a zjod, ale z tym ni ma tak łaps! Praje cołki rok te gizdy majōm ôchrona i strzylać sie ich niy śmi, a jak tu chycić zajōnca po cichu? Powiydźcie, że niy wiycie? Dyć to nasze starziki godali jak jo jeszcze bajtlym była! Sposoby sōm dwa, jedyn to je metoda na sōl! Coby sie to powiōdło, trza se narychtować hrubej soli do płōciynnego miyszka, bo inksze miyszki szuszczōm i zajōnca idzie wystraszyć! Potym trza iś na pole, kaj zajōnce rade lotajōm, a czakać na przileżitość, aż kery ku nōm przidzie bliżyj, a potym styknie yno rynka ze solōm wyciōngnōńć, a ôgōn mu posolić! Sōl we kudłach gryzie, bezto ôn sie ôbroci a ôgōn poliże, a jak już zacznie, to potym niy poradzi skōńczyć, tak mu ta sōl smakuje, że niy do pozōr, a wtynczos my go łaps i do miecha!

Drugo metoda to znoł starzik ôd mojigo chopa. Trza było kupić troszka sznuptabaki, ale dzisio s tym to może być troszka gorzi, bo ludzie mało jōm już używajōm, ale we internecie wszyjstek majōm! Jak już sznuptabaka mōmy, to yno styknie iś na kamiyniste pole, a kery kamiyń niōm posuć! Tych kamiyni na polu musi być wiyncy jak jedyn, coby sie zajōnc niy kapnōł, że to je paść na niego! Ta metoda je doś procno, bo jak kamiyni na polu ni ma, to trza ich prziniyść, ale ôdpado jedna niyfajno robota, niy musicie boroka zajōnczka zbijać, bo jak tabaka powōnio, to se kichnie, praśnie łebōm ô kamiyń, a je gotowy!

Toby sie ani niy zdało, ale nojwiyncy zajyncy dycki chytajōm małe dziecka, jo se pamiyntōm, że jak żech prasła jak dłōgo, to dycki mie sie pytali, eli żech zajōnca chyciła? Yno, że taki zajōnc nic ni ma wert! Też to isto pamiyntocie?

GRYMLINO

Komentarze

Dodaj komentarz