Porzondne wywczasy we Bułgaryji

 

Po naszymu


 

To było jeszcze we 70. latach, jak my już mōgli jechać za granica do bratnich norodōw. Nasze znajōmki wykupiyli se wywczasy we Złotych Piaskach we Bułgaryji, ale coby było łacnij, to se wziyni tam yno kampingowo chałpka, a cołko drōga zamiarowali przejechać swojōm sirynkōm. Bez Czechosłowacjo a Wyngry jechało sie im dobrze, spali pod namiotym kajś na polu, ale żodyn ich niy chyciył, ani niy postraszył.

Jednako już troszka gorzij było jak wjechali do Rumunije. Na granicy ich przitrzimali, bo niy poradziyli spokopić, co te Poloki majōm za dziwoki papiōry, ale potym w kōńcu znod sie taki jedyn, wiyncy szkolōny chop, co po rusku sie ś nimi dogodoł. Padoł im, coby nikaj na uboczu niy stowali, a ze żodnym niy godali, yno prosto jechali do tyj Bulgaryje. Nō, to sie te nasze znajōmki wylynkali! Baba zaczła lamyntować, że ich sam kaj jeszcze zabijōm, a nojstarszy jejich synek, co mu Stanik było, zaroz zaczōn godać ô tych wampirach ze Siedmiogrodu, co to ich we telewizorze pokozowali!

Kōnsek już ujechali, kej na drōdze pokozoł sie jakiś chop ze rukzakym. Cosikej wołoł a na auto pokozowoł i tyn nasz znajōmek stanōł. Rumōn podlecioł, pokozoł, że we rukzaku mo yno ôwoc a isto chcioł go sprzedać, yno że piniyndzy niy chcioł, a na jakla ôd Stanika pokozowoł. Nasi po rusku zaczyni ś nim godać, a dowiedzieli sie, że tyn chop je ze pegeeru, co tam kajś był za krzami, a chcioł ôd nich wyhandlować troszka łachōw do dziecek, bo ze tym u nich było ciynżko. Bezto padali mu, że jak za szternoście dni pojadōm nazod, to mu te łachy sprzedajōm.

We Złotych Piaskach piyknie było, ale gibko sie skōńczyło i zaś trza było jechać nazod bez ta straszno Rumunijo! Po drodze znajōmki mieli mało awaryjo i jak sie z tym chopym, co na nich czakoł, potkali, to było już niyskoro a cima. Przi taszynlampie wymiyniyli jakle ôd dziecek na jodło, a pojechali ku granicy. A tam sie zaczło: jodło im pograniczniki skōnfiskowali, bo bezmała zatrute było, ale jeszcze nasi znajōmki niy sztartli, a już te jodło do podziału poszło.

Ledwie na Wyngry wjechali zrobiyło sie fest zima, a dyszcz loł aże do samych Katowic, a ôni, boroki, bez jodła, piniyndzy, a łachów ôstali, za to ze jednym, potarganym namiotym, co w nim tropik przeciykoł! Nazod przijechali ze rymōm a rojmatykōm, ale mōgli sie wszyjskim kwolić, że sie we Złotych Piaskach wczasowali.

GRYMLINO

1
Baner reklamowy

Komentarze

  • Chop ze Żorow tyn artykuł 08 lipca 2017 12:12Witom wos, Grymlino! Mocie recht, jeżdziło sie do Bułgaryje, Na Wyngry na Balaton, do Dydyerow nad morze, a teroz jo nikaj niy jada bo te wywczasy som za drogi! Pozdrowiom

Dodaj komentarz