Strzibułki na śniodani / Grymlino
Strzibułki na śniodani / Grymlino

Jedyn nasz kamrat, co mu bōło Pieter na miano, ôgrōmnie rod robiył drugim szpasy, ale żodnymu tym fest niy ukrziwdziył, bezto mu ludzie te jego gupoty wyboczali, mało sie zdarzało, coby sie kery na niego poszarpoł. Jak prziszoł ku nōm taki jedyn Stefan, co bōł rodym ôd Sandomiyrza, to Pieter go dycki naskwol mianowoł Sztefan, chociaż tyn chop ni mioł tego rod, a dycki Pietra poprawioł. Nasz szef tego żganio już niy poradziyl zdzierżyć i roz im padoł, coby se dali po szlagu, a potym, coby bōł już świynty spokōj! I tak sie ôroz ôba synki skamraciyli, a kamracōm do dzisio! Ale borok Stefan ni mioł we tyj robocie leko, bo synek bōł uczynny i jak szeł do kijosku, co stoł kōnsek ôd naszego biōra, dycki sie pytoł, co kery chce, abo kupić potrzebuje. Nojstarszy s nos bōł taki jedyn Karlik, co jo mu dycki dwojała. Tyn chop to bōł „Ślōnzok zażarty”, tak dycki na sia godoł, a chcioł kōniecznie zrobić ze Stefana Ślōnzoka. Roz kozoł mu kupić dwie żymły do sia, a dwie bułki do panoczka kerownika, co bōł bezmała ze Warszawy. Stefan bułki prziniōs, ale gorzi bōło ze żymłami, bo przedowaczka, co tyż bōła przibytno, niy wiydziała, co to je! Jak mu to wszyjstek Pieter ôbjaśniył, to tyn modziok sie yno ôśmioł, a padoł, że sie wiyncy nabrać niy do! I bez pora dni dowoł pozōr, co mu kamraci godajōm. Ale jedyn roz zaś lecioł do tego kijosku po cosik do jodła i Pietrowi sie spomniało, że zapōmnioł wziōnś śniodani ze chałpy. Bezto za nim zawołoł, coby mu kupiył ze trzi bułki. Za kwila Stefan bōł nazod, a już ôd dźwiyrzi wołoł, że strzibułkōw we kijosku niy mieli! Jako widzicie, wesoło nōm sie czasym ś nim robiyło!
Ôd tego czasu minyło już kupa lot. Stefan na Ślōnsku ôstoł, wziōn se baba ze Świyntochłowic i teroz godo na sia, że je „naturalizowany” Ślōnzok, a jego kamrat Pieter dwaścia lot nazod do Rajchu za robotōm pojechoł. Mo sie tam dobrze, ale dycki jak sie potkōmy, to spōmino te swoji poczōntki na nimiecki ziymi. Nimiecki znoł, ale tam mu tyż taki szpasy kamraty we robocie robiyli, jaki ôn przibytnymu Stefanowi kejś robiył! Jako widzicie roztōmili, nic ni ma za darmo.

Baner reklamowy

Komentarze

Dodaj komentarz