Niy bydź rozszafny

Podle mie rozszafny, to je tyn, co wszyjstek, co mo, rozciepuje na prawo i lewo a niy dowo pozōr ani na to, że jutro, a nejdeli pojutrze niy bydzie mioł, co do garca wrazić! Dobrze je, jak mo ze czego rozciepować, to se krziwdy wielgi niy zrobi, ale sōm tyż taki ludzie, co radzi rozciepujōm cudze abo taki, na kere sie sami niy narobiyli. Znałach takigo jednego chopa, co se wziōn baba doś bogato ze chałpy. Jak sie żyniyli, to tyn istny mioł yno swōj szaket a galoty na zadku, ale godoł, że ôn mo fest-gowa, bezto je wort wielgich piniyndzy! Nikedy se myśla, że je wielgo szkoda, że mu żodyn tego hubnego myślynio a godanio ze łepy niy wybiōł! Bo jak sie dorwoł do piniyndzy ôd swoji babeczki, to ich rozciepowoł na lewo i prawo, a kożdy rok nowe auto mieć musioł, bo piniōndze przeca na to były! Wywczasy za granicōm, co sie niymi fest przekwoloł, tyż jego baba dycki zapłaciyła. Ôna sie jednako na wszyjski te piniōndze narobić musiała, bo ôjcu we robocie pōmōgała, za to roztōmiły panoczek sie żodnej roboty niy chytoł, yno groł wielgigo prezesa we fyrmie ôd szwigerfatra. Skuli tego na kōniec to mu już tak fest walyło do dekla, że wszyjskim godoł, że ta cołko familijno „fortuna” ônymu sie noleży. Jako prezes jōm zarobiył, bo tak ta fatrowo fyrma dobrze kludzi! Wszyjstek tyn istny płaciył piniōndzami ôd swoji baby, a ôd niygo piniōndze dycki ôstowały we szporkasie i kożdy mōg se ôbejrzeć jaki ôn je szporobliwy! Jo sie dycki zastanowiała, eli tyn chop je bardzi szporobliwy, abo wiyncy rozszafny? Ale teroz to se myśla, że nojlepi szło mu cyganiyni a ôgupiani ludzi, bo byli tacy, co we te jego godki uwierzili! Jak szwigerfater umrził, to tyn chop ta swoja roztōmiło babeczka ze torbami puściył! Sōm tyż wiela straciył, bo ni mioł teroz gdo na niego robić! Ci istni bez ta chopowo rozszafnoś wiela straciyli, a już sie niy podźwigli.Za reszta piniyndzy kupiyli pora kołōw i aż do pynzyje ze tyj wypożyczalnie żyli, ale na wiela im niy stykło!
Ludzie dycki idōm ze jednego kōnta we drugi! Synek ôd tego rozszafnego chopa tyż teroz mo swōj biznes. Wszyjskim godo, że taki gupi a rozszafny jako tatulek, to ôn niy bydzie, bezto na wszyjskim do przesady szporuje!

Ps. Serdeczne podziynkowani za pōmōc we ślōnski korekcie do panoczka Alojza Zimōńczyka.

Komentarze

Dodaj komentarz