Piykny hanszrif

Dōwni tyż ludzie do urzyndōw pisali, ale swojōm rynkōm! Kożdy pisoł jako umioł, nikedy i jakich felerów nastrzyloł, ale jak sie taki pismo przeczytało, to sie czuło, że sie mō do czyniynio ze żywym czowiekym! Pamiyntōm to jeszcze ze tych czasōw, jak żech we jednym urzyndzie bez pora lot robiyła. Wtynczos maszyny do pisanio we chałpach to yno bogatsi ludzie mieli: jaki inżyniyry, pisorze abo urzyndniki! Pismo napisane na maszynie isto musiało prziś ze jakigosik biōra abo urzyndu! A teroz to czynsto ani niy wiysz, skōnd te pismo je, podwiel go niy ôtworzisz! We pojstrzōdku wszyjski te pisma tyż sōm taki same, że sie ich ani poczytać niy chce, pra? Nojwiyncy skuli tego, że je tam połno takich słowōw, co ich ani te bardzi szkolōne ludzie niy poradzōm spokopić!
Jak sie downi dostało brif ôd ciotki Trudy, to sie już po kopercie poznało, abo jak nasz dochtōr Kowolik wypisoł recept, to ani aptykorki niy poradziły tego rozszyfrować, yno zaroz chytały za telefōn a kozały sie do ônego połōnczyć! Niy darmo sie godało, że nikerzi majōm rychtik dochtorski hanszrif! Jak jo na poczōntku 70-tych lot chodziyła do plastycznej szkoły, to my mieli nauka „liternictwa”, bo wszyjski plakaty a tablice sie ryncznie wypisowało, a teroz litery nōm maszyna przirychtuje, styknie ich przilepić, abo wydrukować. Teroz już nic ni ma taki jako dōwni. Ale eli je to gorsze abo lepsze ciynżko pedzieć, bo kożdy kij mo dwa kōńce! Zatym jeszcze ludziska wszyjski pisma podpisujōm swojōm rynkōm a swojim mianym, ale to sie tyż kejś skōńczy, bo cosik godajōm ô „podpisie elektrōnicznym”. Już ta cołko grafologijo teroz sie na nic niy przido, bo niy bydzie co sprowdzać! Ale słyszałach, że ni ma zaś aż tak źle, bo niy wszyjski drukarki tak samo drukujōm. Bezto se myśla, że jedna nauka sie straci, a drugo sie narodzi!
Roztōmili, szanujcie se to, że sie jeszcze podpisać poradzicie, a zrobić to mocie sposobnoś. Bo za pora lot może być tak, że nasz wnuczek Tomek Kowalski bydzie sie podpisōwoł: 27TK.22 76.X. Jo se myśla, że to bezto ludziska wymyśleli tyn Dzień Pisma Ręcznego, co przipado we styczniu, a Wy, co padocie?

2
Baner reklamowy

Komentarze

  • Grymlino. Do Baby ze Żorow 05 lutego 2019 16:42Dziękuję za przeczytanie mojej gawędy! Pozdrawiam
  • Baba ze Żorów Hanszrif 02 lutego 2019 21:56Mocie recht Grymlino

Dodaj komentarz