Jedyn dziyń bez śmieci

To samo je ze tym papiorōwym hantuchym. Rozlołach kawa, a zaroz żech po niygo siōngła i miałach potym kupka mokrego papiōru! Do kosza we kuchyni tego niy wciepna, bo go zaroz zaciaprōm! Bo te wszyjski śmieci co tam kłada, jeszcze mōj chopeczek musi posegregōwać. Wciepać do kosza we łaziynce, tyż gupie, bo zaroz wszyjstek zacznie wyrkować, a mōmy smrōd na cołko chałpa! Jak wciepna do klozetu, to sie zatko, a zaś bydzie robota! To nojlepi wyniyś do „zmiyszanych”, ale tam już tyź bōło pōłno! Jeszczech ani śniodanio niy zjadła, a już żech sie po drugi znerwowała! Zaparziłach wrzawōm wodōm dwa tyje, a za mōmynt miałach dwa mokre „pampersy”, co jich jeszcze musza nojprzōd wysuszyć niż jich wyciepna!
Tak za godzina poszłach do naszego ôsiedlowego sklepu kupić co ku ôbiedzie. Jak sie zrobiyło ciepli, to na ôczy postawiyli tam same papiōrōwe a plastikowe „jednorazōwki”! Moja kamratka kożdo niydziela bez lato tego dziadostwa spory miyszek na swoja działkōwo zegrōdka zaniysie, ale potym musi to wszyjstek nazod przismyczyć, coby tam śmietniska niy zrobić! Przed swojim familokym bechnie tym do kōntynera na śmieci, a myć garcy niy musi! Niby wiela sie godo ô tyj ekologiji, ale tych nylonbojtlow dali we sklepach niy żałujom! Jak mi przedowaczka do bojtla ta kupiōno kura tkała, to ôn ji strzelył we dwōch miejscach i wsadziyła na niygo drugi! Kaj sie niy podziwocie, to wszyjstek, co je mokre, mōmy we plastikowych flaszkach, co sie mianujōm ”bezzwrotne”, a to jeszcze ni ma wszyjstek!!!
Jo se myśla, że wszyjscy mieli by my sie zastanowić, bez czego sie mōgymy ôbyć! Jo wiym, że to ni ma tak łaps, bo dzisio przeca kożdy mo mało czasu, a wygody pozbyć sie niy myśli! Ale kiery scynariusz je czorniyszy? Tyn, że po mlyko a po woda bydymy chodzić ze starymi blachōwkami a kiblami, abo tyn, że nos kejś te hołdy śmieci zasujōm? Roztōmili, dowōm to Wōm pod rozwaga.

Baner reklamowy

Komentarze

Dodaj komentarz