Świynto żymły

We kożdym kraju a we kożdym regiōnie te żymły sōm troszka inaksze. Nasze sōmsiady Czechy godajōm na nich rohliki abo housky. Jak jo we kryzysowych czasach jechała do Czechōw se co pokupować, to żech dycki na żymły housky godała, a paniczki przedowaczki myślały se, że jo je „prażaczka” (baba ze Pragi, tyj Czeski), a czynsto mi pedziały, co cobych se jeszcze mogła kupić, bo majōm praje we magazynie! Mie to mierziyło, że ich tak nabiyrōm, chocioż starzik ôd mojigo tatulka rychtik sie konsek ôd tyj Pragi narodziył a przeżōł tam mode lata!
Jak powiysz „żymła” to cie bydōm rozumieć we Austryji, a we Niymcach ,chocioż tam yno na małe żymły „semmeln” godajōm. Na Wyngrach tyż sie kapnōm, bo Madziary, jako i my, znajōm tyż żymloki, co ich sie już u nos teroz małokedy robi! Ôstatni roz jadła żech żymloki pora lot nazod. Wtynczos jeszcze szło ich we taki małej masarni kupić!
My Ślōnzoki znōmy tyż „bryjtki”. To sōm te wszyjski żymły, co sie do nich troszka cukru dowo, a co im po polsku „drożdżōwki” godajōm. Moja starka dycki godała tak: jak jo mōm na śniodani bryjtka a szolka mlyka, to se pojym za wszyjski czasy. A mōj szwiger tyż rod taki śniodani jodoł, a se kozoł dycki dać ku tymu jeszcze krauzka domowyj marmelady!
Francuzy tyż radzi jedzom bryjtki na śniodani, a „brioszki” im godajōm. Ôstatnimi czasy idzie te francuski żymełki kupić tyż we nikerych naszych marketach. Dobre sōm, ale yno tak na kwila, bo jo nojwiyncy przaja naszym żymłōm. Yno je mi żol, że już ni ma takich, coby aże we zymbach trzeszczały, a coby ś nich szplitry leciały! Isto taki pamiyntocie, pra? Jak żech łoński tydziyń bōła u nos we piekarni, tożech sie pytała ô wypieczōne żymły, bo tam na widoku mieli jakisik blade. Za mnōm stoł jedyn chop, co sie go szpasy trzimały, a zaroz mi ôdpedzioł: – Niy kupujcie paniczko takich żymeł, bo se na nich gybis połōmiecie!
Tōm godkōm mie fest wkurził i jo mu sie zaroz ôdżarła: – Nojprzōd panoczku tyn gybis trza mieć! Niy godejcie gupot, bo jeszcze by se kery pōmyśloł, że taki blade żymły skuli gybisiorzi piekōm!

Ps. Roztōmiłe dziecka, na te wasze świynto życza Wōm piyknych, latowych feryji, a cobyście potym do szkolnej nauki we jednym kōnsku a we zdrowiu nazōd trefiyli.

1

Komentarze

  • zmierzły Chop ze Żorow tyn artykuł 29 czerwca 2019 15:44Zeszły miesionc był żech na byzuchu we Austryji, ale dobrej żymły żech tam niy zjodł, wszystki gumowate jako u nos!

Dodaj komentarz