Kożdy może być artystōm

Roztōmili, musicie sie jednako na sia podziwać inkszym ôkiym, to wszystek sie znojdzie! Jedyn mōj rechtōr ôd malōnkōw dycki godoł tak: Ty jeszcze niy wiysz, że ty to umisz! Coby sie przekonać musisz sie chycić roboty, to uwidzisz, co s tego bydzie! We mojim przipadku to sie wszyjstek społniyło. Bōło mi 12 lot, jak żech ku niymu prziszła ze tatulkiym. Jo dycki malowała ze gowy, a ôn chcioł, cobych namalowała, to, co widza. No i jo mu padała, że niy poradza, ale ôn mie przeświodczył, że to ni ma prowda! Zawoloł takigo syneczka ze placu, posadził go na ryczce, a jo go miała namalować. Wszyjstek poszło „piyrszo klasa”, a jo sie dowiedziała, że poradza zrobić cosik, co mie ani do gowy niy prziszło!
A terozki dōm Wōm inkszy przikład: Nasza ciotka, co je ji już bez ôziydziesiōnt lot, tak ze dziesiynć lot nazod fest sie rozniymōgła, a kupa czasu musiała siedzieć sama w dōma. Roz na izbie znodła rolka plasteliny, Isto jeja wnuczka jōm tam straciyła. Cioteczka jōm wziyna, coby ji żodyn niy rozdeptoł i zastanowiała sie, co ś niōm zrobić. Troszka jōm we rynkach popuczyła, a potym zaczła sie niōm bawić jak bajtel. Przilepiła jōm na kōnsek papendekla a zaczła rozmazować. Piykne to niy bōło, bezto ciotka skryła ta swoja robota do szuflody ze łyżkami, coby wnuczka tego niy uwidziała. Ale sam się jednako przerachowała, bo maluśko tam pojrzała, jak yno prziszła ze szkōłki dō dōm. Te starczyne „mazy” fest ji sie uwidziały, a prziniosła jeszcze wiyncy tyj plasteliny, coby starka dorobiyła ku nim kwiotki. I tak cioteczka zaczła robić ôbrozki ze plasteliny. Sōm taki gryfne, że ludzie ich radzi we swoich izbach wiyszajōm, a paniczka ze Domu Kultury zrobiyła cioteczce piykno wystawa. No to sie ta baba noreście tōm artystkōm poczuła, a na wiyncy se szafła! Niy dali jak wczora zwōniyła mi, że se wylepiła piykno ikona, ale na ściana powiesi jōm dziepiyro na kolynda.
Jako widzicie, coby ôstać artystōm niy sōm ważne lata, ale chynci! I na staroś artystōm dōmōwym abo ôsiedlōwym dycki ôstać mōgecie, czego Wōm wszyjskim ze szczyrego serca życza!

Komentarze

Dodaj komentarz