Zrobiymy se grilla!

Teroz jednako jak my zbogatli i miynso a wuszty my zaczli piyc na ôgniu na zegrōdce, a niy yno w doma we garcu, to te zegrōdkowe pieczyni trza bōło jakosik pōmianōwać, coby kożdy wiedzioł ô co idzie. Możnej tyż nikerzi nad tym myśleli, coby to bōło jakosik po naszymu. Jednako wiynkszina sie ani wiela niy namyślała, bo już taki miano bōło, yno, że po angielsku! Bezto my teroz tyż „grill” godōmy!
Doś pora lot nazōd byli my na zegrōdce u naszych znajōmkōw, u Walka a Hildki. Ôna miała praje gyburstag (urodziny), bezto nos pytali na tego nowōmodnego grilla. Walek wtynczos bez dwa miesiōnce robiył u swojigo ujka we Rajchu i mioł przijechać yno na dwa dni na te Hildczyne urodziny i jeszcze go niy bōło. Bezto ōna ze synkiym tym grill przirychtowała. Jo sie tyż troszka dziwowała, że do tego gazowego grilla, co go Walek tyż ze Rajchu prziwiōz, oba tkali taki strzybne pakietki, ale jo sie wtynczos na tyj kuchni grillowej jeszcze mało znała! Za jaki pōł godziny na zegrōdce pokozoł sie Walek ze wielgōm taszōm połnōm wusztu. Pojrzoł do tego grilla do pojstrzōdka, wyciep te pakietki, a wsadził tam tym wuszt, co prziwiōz. Kwilka my sie zagodali, a tu ôroz cosik sie zaczło kopcić! Hildka skoczyła retować jodło, ale jak szibła tyn dekel to zgupiała: Zamiast jejjich wymyślatych pakietkōw ze łososiym, bōło tam pōłno spolōnego wusztu! Dziołcha klapła na ziym, jakby kery śni luft wypuściył, a sie rozbeczała! Ciepli my sie jōm pocieszać, a godali my jedyn bez drugigo, że tyn wuszt do sie ôdropać, a zjeś!
I tak to tyż baby, co tam były, zrobiyły! Chlyb znajōmki mieli dobry ze wiejski piekarnie, tōmaty a ôgōrki prziniośli ze zegrōdki za chałpōm, kaj mieli mały „warzywniok”. Do picio bōła wtynczos woda ze studnie, jakisik drogi soki we kartōnach a kiszka, bo se nikerzi, tego wiejskigo szpecyjału życzyli. Wystowcie se kiszka z wusztym! Jo sie ôd tego trzimała ze daleka, ale ci, co to poprōbowałi isto sraczka mieli, bo pod hajźlikym na kōńcu zegrōdki sztyjc raja stoła!
Tak to wyglōndoł nasz piyrszy grill na zegrōdce, a rada go spōminōm.

Ps. Roztōmili, napiszcie mi we kōmyntorzach, jako sie u Wōs na zegrōdce grilluje, możnej sie jeszcze czegosik naucza nowego!

Komentarze

Dodaj komentarz