Jako świyntom łostać

– Jo przeca rychtik niy grzesza, bo pokusōw już żodnych ni mōm, niy to co piyrwej! Dzisio jo je już staro, bezto ze tym chacharstwym je fertik a szlus! Terozki to jo je tako porzōndno, żebych mogła przikład dować! Jak pōda za miesiōnc do farorza na ucho to ś nim pogodōm.
Jak pedziała – tak zrobiyła.
– Wiedzōm farorziczku –zaczła – jo prziszła dzisio do tyj spowiedzi, ale mōm jedna utropa i niy wiym, jako mōm Wom to padać…
– Zacznijcie babo, ôd poczōntku, ale najprzōd godejcie swoji grzychy!
– No, kōnszt je we tym, że jo dzisio żodnego grzychu ni mōm. Jo już downo se tym łep susza, ale wychodzi na to, że jo richtik niy grzysza!
– No, co wy, babo! Jo je ksiōndz,
a grzychy mōm jako kożdy, a wy tak nic? Niy farōnicie? Niy cyganicie? Niy ôbgadujecie ?
– Niy, nic! – pado mu na to baba.
– Ô pierōna! Wyboczcie tak mi to wyskoczyło! – przeprosił farorz – To by Wos ku świyntym abo chociaż ku błogosławiōnym porachować potrza bōło! Jo musza biskupowi dać znać, a ôn potym do samego Rzimu rzecz przekoże… – Farorz zaczōn se robić szpasy, ale baba sie niy kapła, yno sie ze taki godki uradowała.
– Jakby ôni tak mōgli, farorziczku, to jo bych była ôgrōmnie rada, bo wiycie, mie samej tak, to niy przistoji! Jeszcze by se kery pōmyśloł, że sie przekwolōm. A na ôbrozku to jo bych chciała być we lila szatach, bo mie je ôgrōmnie piyknie we tyj farbie…
– A sam Wos, babo, mōm! Tym wasz grzych mianuje sie pycha! Jako widzicie, chocioż jedyn grzych mocie!
A za pokuta piyńć razy do Anabergu na pōnć, a cołko droga piechty, ani kōnsek na fōrze!
Baba przijyna, co farorz godoł, ale niy poradziła spokopić, ô co sie farorziczek na nia tak rozkokociył. Przeca ōna yno prowda godała, a za to jeszcze kora dostała! Jako sami widzicie swiyntōm ôstać, mimo nojlepszych chynci, ni ma tak łaps! Baba uznała, że trza mieć świynto ciyrpliwoś do farorza, a jeszcze ku tymu nauczyć sie dobrze cyganić! Ale przeca ô świyntym cygonie żodyn jeszcze niy słyszoł! No, ale kieryś musi być piyrszy!

Komentarze

Dodaj komentarz