Kożdy bajtel chyba – wiym to po sobie – niy umi sie doczekać, kiedy urośnie i bydzie se mog jak tatulek i starzik wziąć tyn zakozany owoc do gymby.Ta cygareta to była wtedy dlo nos takom przepustkom do świata starszych.Przeca jak tatulek cygara zakurził, tak piyknie woniało w cołkij chałupie. Pamiyntom, jak roz żech był u mojigo kolegi, co od niego starzik niy kurził kożdy dziyń, to jak sie miało ku kolyndzie, musioł zakurzić cygara i chodzić po wszystkich izbach tego woniu narobić, tak mu jego Angela kozała, bo farorz ogromnie dycko chwolił i pytoł sie, kaj tyn starzik te cygary kupuje.Starzik od Stanika to zaś kurził fajka, ale niy tako malutko, kero do kapsy idzie schować, łon mioł fajfka, kero musioł na ryczce spiyrać. Długo była ta faja chyba z połtara metra, a na tym cybuchu porcelanowym było pełno malutkich obrozkow wojokow na koniach z flintami na plecach. Tam zaś, kaj był jaki wolny plac, to były drobnymi literami nazwiska popisane od tych wszystkich kamratów z wojska. Heromin tyż ta faja kurził yno od świynta. Syjmowoł jom ze ściany, kaj na hoku wisiała pod ślubnym obrazym, i możno poł godziny jom nabijoł jakomś ekstratabakom. Miyszoł „machorka” ze suszonymi śliwkami, feferminicom i jakimiś tam jeszcze ziołkami, puściył se „kołchoźnik” na cołki karpyntel, a potym siodoł na swojim opasztulu i kozoł Stanikowi zapolić ta faja.Stanik nikedy trzi kołki wyszkyrtoł, zanim sie rychtyk chyciyła usztamfowano tabaka w cybuchu. Jak jo mu dycko zowiściył tego podpolowanio, ale Stanikowi to tyż było zocne i nigdy mi niy doł tego zrobić, chocioż roz mu starzik kozoł dać mie to podpolić.Siedzieli my w tyj izbie u Heromina i do kupy śnim tyn niby „woń” wdychali, a łon cmankoł jak diosi i kurziło sie z tego cybucha jak z kumina.Prziszoł czas niyskorzij, że my sami zaczli próbować cygarety pokurzować. Było nom możno z dwanoście lot, jak Eriszek przinios nad rzyka – kaj my sie kompali – cołko paczka cygaret, co sie nazywały „Mewa”. Woniały czekuladom i tam my sie zaczli tym kurzym zaciągać, aże sie mi źle zrobiyło. Szoł prawie jakiś starszy chop i padoł: – Gynsiniec se do gymby weźcie, a niy cigareta...Od tego czasu odechcialo mi sie kurzynio i jakoś wytrzimoł żech z tym doś długo. Dopiyro w wojsku, kaj dowali kożdymu na dziyń 10 cigaret o nazwie „Mazur” i kapral nom robiył przerwa na kurzynie, to żech sie nauczył rychtyk kurzić, bo ci co niy kurzili, musieli papiorki zbiyrać po obyńściu.Tak to człowiek stoł sie niywolnikiym nałogu i kurził coroz wiyncyj. Ani sie niy spodzioł, kiedy jedna paczka cygaretow niy stykła na dziyń. Lata leciały i płuca coroz bardzij sie bontowały, bo coroz to czyńścij sie kucało i w karku szczypało. Jednak po sztyrnostu latach tego cmankanio padoł żech doś tego i przi jakiś gripie, kedy cygareta niy podłaziyła, wytrzas żech wszystki cygarety i aszynbechry do hasioka. Najgorzij było wytrzimać tydziyń, potym miesiąc, no i w końcu rok. Dzisiej minyło prawie trzidziyści dwa lata, jak żech wzion rozwod z tymi gwoździami do truły.
Komentarze